Türkmenistanda daşary ýurt dilleri boýunça olimpiada geçiriler
Türkmenistanda gysga möhletli okuwlary geçirýän ähli eýeçilik görnüşindäki bilim edaralarynda bilim alýanlaryň arasynda Daşary ýurt dilleri boýunça Döwlet olimpiadasy geçiriler. Bäsleşik üç tapgyrda amala aşyrylar. Daşary ýurt dilleri boýunça Döwlet olimpiadasynyň birinji tapgyryny 8-nji fewralda bilim merkezlerinde geçirmek göz öňünde tutulýar.
21-nji fewrala bellenen ikinji tapgyr Aşgabatdan we Ahal welaýatyndan gatnaşýanlar üçin D.Azady adyndaky Türkmen milli dünýä dilleri institutynda, Balkan welaýatyndan gatnaşyjylar üçin – Balkanabat şäheriniň tebigy ylymlar dersleri çuňlaşdyryp öwredýän 21-nji ýöriteleşdirilen orta mekdebinde, Daşoguz welaýaty boýunça – Türkmen oba hojalyk institutynda, Lebap welaýaty boýunça – Seýitnazar Seýdi adyndaky Türkmen döwlet mugallymçylyk institutynda, Mary welaýaty boýunça bolsa – Mary şäheriniň Türkmen döwlet energetika institutynda geçiriler.
Daşary ýurt dilleri boýunça döwlet olimpiadasynyň jemleýji üçünji tapgyrynyň 19-20-nji martda D.Azady adyndaky Türkmen milli dünýä dilleri institutynda geçirilmegi meýilleşdirilýär.
Çäräni ýokary guramaçylyk derejesinde geçirmek üçin guramaçylyk topary, baş eminler topary hem-de synçylaryň iş topary döredildi.
ORIENT news
