Türkmenistan Saud ösüş gaznasy bilen hyzmatdaşlygy berkidýär
7-nji ýanwarda Türkmenistanyň Prezidenti Serdar Berdimuhamedow Saud ösüş gaznasynyň Baş direktory Sultan Abdulrahman Al-Marşad bilen duşuşyk geçirdi.
Türkmenistan köp ýyllaryň dowamynda bu gazna bilen hyzmatdaşlyk edip gelýär. Gazna saglygy goraýyş, ulag-aragatnaşyk, maliýe ulgamlaryndaky iri taslamalary maliýeleşdirilmegine işjeň gatnaşdy.
Taraplar hyzmatdaşlygy has-da giňeltmäge we täze başlangyçlary durmuşa geçirmäge taýýardyklaryny mälim etdiler we myhman Türkmenistanyň maýa goýum mümkinçiliklerine uly gyzyklanma bildirýändigini tassyklady.
Sultan Abdulrahman Al-Marşad şeýle hem Türkmenistanyň DIM-nde Daşary işler ministri Raşid Meredow bilen duşuşdy. Duşuşykda saud maýasynyň gatnaşmagyndaky gaýtadan dikeldilýän energiýa çeşmeleri, suw we oba hojalygy, saglygy goraýyş ulgamlaryndaky geljegi uly bolan taslamalary gözden geçirdiler.
Sultan Abdulrahman Al-Marşadyň Türkmenistanyň Döwlet daşary ykdysady iş bankynyň ýolbaşçylary bilen bolan duşuşygynda Türkmenistanyň Hökümeti bilen Saud ösüş gaznasynyň arasynda degişli resminama gol çekildi. Bu resminama, hyzmatdaşlygy berkitmäge we giňeltmäge gönükdirilendir diýip, Türkmenistanyň Döwlet teleradio ýaýlymynyň habarlar gepleşiginde habar berildi.
ORIENT
