Türkmenistanyň Prezidenti Belarus Respublikasynyň ilçisini kabul etdi
Prezident Serdar Berdimuhamedow Belarus Respublikasynyň Türkmenistanda täze bellenen Adatdan daşary we Doly ygtyýarly ilçisi Stanislaw Çepurnoýy kabul etdi. Ilçi döwlet Baştutanyna ynanç hatyny gowşurdy.
Diplomat Türkmenistanyň Prezidentine şeýle hem türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa Belarus Respublikasynyň Prezidenti Aleksandr Lukaşenkonyň mähirli salamyny we iň gowy arzuwlaryny, şeýle-de ýurdunyň däp bolan dostlukly döwletara dialoga ygrarlylyk baradaky sözlerini ýetirdi.
Döwlet Baştutany belarus Liderine mähirli salamyny we hoşniýetli arzuwlaryny beýan edip, ilçini jogapkärli diplomatik wezipä bellenilmegi bilen gutlady. Belarusuň doly ygtyýarly wekiliniň öz wezipesini ýerine ýetirýän döwründe ikitaraplaýyn netijeli hyzmatdaşlygy pugtalandyrmaga hemmetaraplaýyn ýardam etjekdigine ynam bildirip, Serdar Berdimuhamedow oňa işinde üstünlikleri arzuw etdi.
Duşuşygyň dowamynda deňhukuklylyk, birek-birege hormat goýmak, ynanyşmak, netijeli hyzmatdaşlyk ýörelgelerine esaslanýan türkmen-belarus gatnaşyklarynyň häzirki ýagdaýy hem-de geljegi barada gyzyklanma bildirilip pikir alşyldy. Şunuň bilen baglylykda, ýurtlarymyzyň diňe bir ikitaraplaýyn däl, eýsem, köptaraplaýyn görnüşde, halkara we sebit guramalarynyň, şol sanda BMG-niň, GDA-nyň çäklerinde işjeň gatnaşyk edýändikleri kanagatlanma bilen bellenildi.
Şunuň bilen bir hatarda, döwletara ynsanperwer hyzmatdaşlyga uly ähmiýet berilýär. Türkmenistanyň hem-de Belarus Respublikasynyň ylym-bilim, sport, medeniýet ulgamlaryndaky ýakyn hyzmatdaşlygy iki ýurduň we halklarynyň arasyndaky dostlukly gatnaşyklary çuňlaşdyrmaga ýardam edýär.
Diplomat däp bolan türkmen-belarus gatnaşyklaryny mundan beýläk-de berkitmek hem-de özara bähbitli hyzmatdaşlygy ösdürmek üçin ähli tagallalary etjekdigini ynandyrdy diýip, “Нейтральный Туркменистан” gazeti habar berýär.
Stanislaw Çepurnoý – halkara hyzmatdaşlygy we söwda ulgamynda köp ýyllaryň dowamynda işläp gelýän tejribeli diplomat. Türkmenistana ilçi wezipesine bellenmezinden ozal Belarusyň Ministrler Geňeşiniň Diwanynyň halkara hyzmatdaşlygy we söwda bölüminiň müdiri bolup işledi.
Çepurnoýyň eýýäm daşary ýurtda ilçi wezipesinde işlemekde üstünlikli tejribesi bar. 2014-nji ýylda Belarusyň Mongoliýadaky ilçisi wezipesine bellendi we ol ýerde 2021-nji ýyla çenli işledi.
Türkmenistanda täze ilçiniň bellenilmegi Minsk bilen Aşgabadyň arasyndaky ykdysady we syýasy gatnaşyklary çuňlaşdyrmak üçin ädim hökmünde görülýär. Türkmenistan we Belarus Respublikasy adatça oba hojalygy, senagat we bilim pudaklarynda hyzmatdaşlyk edýär.
ORIENT
