Türkmenistanyň Prezidenti ykdysadyýet we bank toplumynyň 2025-nji ýyl üçin iş meýilnamalaryny tassyklady
Türkmenistanyň Prezidenti Serdar Berdimuhamedow Ministrler Kabinetiniň mejlisinde ykdysadyýet, maliýe we bank toplumynyň 2025-nji ýyl üçin iş meýilnamalarynyň taslamalaryny tassyklady. Hasabaty Ministrler Kabinetiniň Başlygynyň orunbasary H.Geldimyradow berdi.
Bellenilşi ýaly, resminamalar Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasynyň esasynda işläp taýýarlandy. Meýilnamalarda makroykdysady durnuklylygy üpjün etmek, sanly ykdysadyýeti ilerletmek, häzirki zaman tehnologiýalarynyň ornaşdyrylmagy göz öňünde tutulan. Durmuş-ykdysady ösüşi, maýa goýum syýasatyny kämilleşdirmek, döwlet emlägini we maliýe serişdelerini netijeli dolandyrmak meselelerine aýratyn ähmiýet beriler.
Şeýle hem, kanunçylyk binýadyny kämilleşdirmek, bank we ätiýaçlandyryş hyzmatlaryny, standartlaşdyryş ulgamyny ösdürmek, milli statistika edaralarynyň işini döwrebaplaşdyrmak boýunça çäreler meýilleşdirilen. Wise-premýer 2025-nji ýylda ministrlikleriň we pudaklaýyn edaralaryň işine sanly tehnologiýalary ornaşdyrmaga gönükdirilen çäreleriň taslamalary bilen tanyşdyrdy. Bu bolsa “Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasynda” hem-de “Türkmenistanda sanly ykdysadyýeti ösdürmegiň 2021 — 2025-nji ýyllar üçin Döwlet maksatnamasynda” bellenen wezipelere laýyk gelýär.
Prezident Serdar Berdimuhamedow ykdysady durnuklylygy üpjün etmegiň hem-de Döwlet býujetiniň üstünlikli ýerine ýetirilmegini gazanmagyň möhümdigini belledi. Döwlet Baştutanymyz tassyklanan iş meýilnamalarynyň durmuşa geçirilmegini hem-de ähli çäreleriň öz wagtynda ýerine ýetirilmegini üpjün etmek boýunça tabşyryklar berdi.
ORIENT news
