TDHÇMB-da söwdalaşyklar: geçen hepde 19 geleşik hasaba alyndy
Geçen hepde Türkmenistanyň Döwlet haryt çig-mal biržasynda geçirilen söwdalaşyklaryň dowamynda 19 geleşik hasaba alyndy.
Owganystanyň telekeçileri daşary ýurt walýutasyna “Türkmennebit” Döwlet konserninde işlenilen esas ýagyny we suwaldylan gazy satyn aldylar.
Mundan başga-da, daşary ýurt walýutasyna dürli görnüşli matalar we nah ýüplükler ýerlenildi. Satyn alyjy-ýurtlar: Birleşen Arap Emirlikleri, Türkiýe, Gyrgyzystan. Geleşikleriň umumy bahasy 828 müň amerikan dollaryndan gowrak.
Içerki bazara türkmen işewürleri polipropilen (“Türkmennebit” DK), float düz aýnasyny, gaplaýjy örtügi, şeýle hem pagta süýümlerini we dokma önümçiliginiň galyndylaryny satyn aldylar. Geleşikleriň umumy bahasy 52 mln 38 müň manatdan gowrak.
Türkmenistanyň Döwlet haryt çig-mal biržasyndaky kesilen nyrhlar bilen şu salgyda tanyşyp bilersiňiz.
ORIENT news
