Ak başly bürgüt ABŞ-nyň resmi milli guşy boldy
ABŞ-nyň Prezidenti Jo Baýden “ak başly bürgüdi” ýurduň milli guşy hökmünde resmi ýagdaýda ykrar edýän kanuna gol çekdi.
240 ýyldan gowrak Birleşen Ştatlaryň nyşany bolan ak başly bürgüt ýurduň resmi milli guşy boldy. Degişli resminama Jo Baýden gol çekdi. Ak başly bürgüdiň nyşany ABŞ-nyň döwlet resminamalarynda 1782-nji ýyldan başlap ulanylyp başlandy. Ak başly bürgüdiň şeklini amerikan resminamalarynda, şol sanda tugrasynda, prezident ştandartynda, pul belliklerinde hem-de beýleki döwlet nyşanlarynda görüp bolýar.
Ygtyýarlyklarynyň möhleti tamamlanyp barýan Baýdeniň umumylykda 50 sany kanunlara gol çekendigi barada bellenilýär. Demirgazyk Amerikada ýaşaýan hem-de yklymyň iň iri ýabany guşlarynyň biri hasaplanylýan ak başly bürgüt döwlet resminamalarynda ulanylandygyna garamazdan, mundan ozal hiç bir wagt ýurduň milli guşy diýlip yglan edilmedi.
ORIENT NEWS
