Türkmenistan 2025-nji ýyl üçin daşary syýasatda ileri tutulýan ugurlary kesgitledi
27-nji dekabrda Türkmenistanyň Daşary işler ministrliginde 2024-nji ýylda ýurduň daşary syýasat işiniň netijelerine we geljek ýyl üçin ileri tutulýan ugurlary kesgitlemäge bagyşlanan mejlis geçirildi.
Duşuşyga ministrligiň ýolbaşçylary we işgärleri, ýurtlardaky diplomatik wekilhanalarynyň we konsullyk edaralarynyň ýolbaşçylary gatnaşdylar hem-de sebitde we dünýäde parahatçylygy, howpsuzlygy we hyzmatdaşlygy pugtalandyrmaga gönükdirilen Bitarap Türkmenistanyň daşary syýasat ugrunyň durmuşa geçirilişini ara alyp maslahatlaşdylar. Tamamlanyp barýan ýyl möhüm wakalara baý ýyl bolandygy, şol sanda beýik türkmen şahyry Magtymguly Pyragynyň doglan gününiň 300 ýyllygyny ýokary derejede bellenilendigi nygtaldy.
Türkmenistanyň Daşary işler ministri Raşid Meredow Prezident Serdar Berdimuhamedowyň we Türkmenistanyň Halk Maslahatynyň Başlygy Gurbanguly Berdimuhamedowyň parasatly ýolbaşçylygynda daşary syýasat ugruny durmuşa geçirmekde yhlasly zähmet çekmegi dowam etdirmegiň ähmiýetini belledi.
“Türkmenistanyň başlangyjy bilen BMG-niň Baş Assambleýasy tarapyndan yglan edilen Halkara parahatçylyk we ynanyşmak ýylynda ýurduň döwlet Baştutanynyň görkezmelerine laýyklykda diplomatik gullugynyň öňünde anyk wezipeler kesgitlenildi” – diýip DIM-niň metbugat beýanatynda aýdylýar.
Şeýle uly göwrümli başlangyç, türkmen diplomatiýasy üçin täze mümkinçilikler açýar.
Türkmenistanyň döwletler bilen halklaryň arasyndaky ynamy berkitmäge gönükdirilen BMG-niň bu kararnamasyny durmuşa geçirmek üçin netijeli işlerini dowam etdirmegine garaşylýar. Bu maksada ýetmek üçin ählumumy howpsuzlygyň we hyzmatdaşlygyň häzirki meselelerine bagyşlanan birnäçe halkara forumlary, maslahatlary we medeni çäreleri geçirmek meýilleşdirilýär. Mundan başga-da, Türkmenistan BMG-niň çäginde köptaraplaýyn diplomatiýany pugtalandyrmaga we ählumumy meseleleriň özara kabul ederlikli çözgütlerini tapmaga gönükdirilen başlangyçlaryny işjeň durmuşa geçirer.
ORIENT
