Türkmenistanyň DIM-de Özbegistanyň Ilçisi bilen duşuşyk geçirildi
20-nji dekabrda Türkmenistanyň DIM-de Daşary işler ministriniň orunbasary Ahmet Gurbanow bilen Özbegistan Respublikasynyň Türkmenistandaky Adatdan daşary we Doly ygtyýarly Ilçisi Rawşanbek Alimowyň arasynda duşuşyk geçirildi.
Duşuşykda taraplar ikitaraplaýyn hyzmatdaşlygyň möhüm meseleleri barada pikir alyşdylar. Soňky ýyllarda Türkmenistan bilen Özbegistanyň arasyndaky hyzmatdaşlygynyň dürli ugurlar boýunça üstünlikli ösdürilýändigi bellendi Ýokary derejede yzygiderli esasda geçirilýän duşuşyklaryň we özara saparlaryň netijesinde iki ýurt hyzmatdaşlygyň hil taýdan täze derejesine çykdylar.
Syýasy-diplomatik, söwda-ykdysady, medeni-ynsanperwer ulgamlardaky ikitaraplaýyn hyzmatdaşlygyň häzirki ýagdaýyna we ony ösdürmegiň mümkinçiliklerine aýratyn üns berildi. Şeýle-de ozal gazanylan ylalaşyklaryň durmuşa geçirilişi bilen bagly meseleler ara alnyp maslahatlaşyldy.
Taraplar türkmen-özbek hyzmatdaşlygynyň mundan beýläk-de berkidiljekdigine we ösdüriljekdigine ynam bildirdirip, onuň iki ýurduň doganlyk halklarynyň abadançylygy we gülläp ösmegi üçin möhümdigini aýtdy.
ORIENT
