«Altyn Asyr» derbi duşuşygynda «Ahaldan» üstün çykdy
Paýtagtymyzdaky «Sport toplumy» stadionynda ýurdumyzyň futbol çempionatynyň 30-njy tapgyrynyň wagty süýşürilen duşuşygy geçirildi. Onda öz meýdanynda «Altyn Asyr» «Ahaly» kabul etdi.
Bu duşuşyk «aragatnaşykçylaryň» 1:0 hasabyndaky ýeňişi bilen tamamlandy. Ýeketäk goly duşuşygyň 21-nji minutynda ýarymgoragçy Röwşengeldi Halmämmedow geçirdi.
Ikinji orny wagtyndan öň «Ahal» topary (67 utuk) eýelän bolsa, «Altyn Asyr» topary (59 utuk) çempionaty üçünji orunda tamamlady.
Türkmenistanyň futbol çempionatynyň doly jemlenmegi üçin ýene-de iki duşuşygyň geçirilmelidigini ýatladýarys. Bu duşuşyklarda «Aşgabat» – «Altyn Asyr» (31-nji tapgyryň senesi süýşürilen duşuşygy) hem-de «Altyn Asyr» – «Köpetdag» (32-nji tapgyryň senesi süýşürilen duşuşygy) toparlary güýç synanyşarlar.
Ýeri gelende bellesek, «Arkadag» topary bassyr ikinji ýyl wagtyndan öň çempionlyk derejesini gazandy. Wladimir Baýramowyň tälim berýänleri çempionatyň dowamynda ýeke utuk ýitirmezden çempion bolmagy başardylar.
ORIENT News
