Türkmenistan we Ýaponiýa ykdysady hyzmatdaşlygyň täze gerimini gurýarlar
17-nji dekabrda Aşgabatda Ykdysady hyzmatdaşlyk boýunça türkmen-ýapon komitetiniň 15-nji mejlisiniň çäginde öňdebaryjy ýapon kompaniýalarynyň wekilleri bilen netijeli duşuşyklar geçirildi.
Gatnaşanlar ikitaraplaýyn ykdysady hyzmatdaşlygyň häzirki meselelerini ara alyp maslahatlaşdylar we bilelikdäki işiň geljegi uly ugurlaryny beýan etdiler. Soňky ýyllarda Türkmenistan bilen Ýaponiýanyň arasyndaky söwda we ykdysady gatnaşyklaryň ep-esli derejede pugtalanandygy we ýurtlarymyzyň arasynda söwda dolanyşygynyň mukdaryny artdyrmak meýliniň bardygy bellenildi.
Hökümet agzalary we birnäçe pudak edaralaryň ýolbaşçylary bilen geçirilen duşuşyklarda energetika, ulag we kommunikasiýa, senagat, oba hojalygy we gurluşyk, maliýe we maýa goýum ýaly möhüm pudaklarda hyzmatdaşlygy ösdürmegiň geljegine aýratyn üns berildi.
Hususan-da, taraplar kärhanalary döwrebaplaşdyrmak we energiýa tygşytlaýjy tehnologiýalary ornaşdyrmak boýunça bilelikdäki taslamalary durmuşa geçirmäge gyzyklanma bildirdiler.
Ýaponiýanyň wekiliýetiniň Türkmenistana sapary dowam edýär.
ORIENT
