Türkmenistanyň wekiliýeti Owganystandaky bilelikdäki ykdysady taslamalaryň durmuşa geçirilişi bilen tanyşdy
15-nji dekabrda Daşary işler ministri Raşid Meredowyň ýolbaşçylygyndaky Türkmenistanyň wekiliýeti Owganystana iş saparyny amala aşyrdy. Daşary işler ministriniň wezipesini wagtlaýyn ýerine ýetiriji Amir Han Mottakiniň ýolbaşçylygyndaky Owganystanyň wekilleri Türkmenistanyň wekiliýetiniň ýany bilen gitdiler.
Saparyň maksady – Türkmenistanyň we Owganystanyň gatnaşmagynda durmuşa geçirilýän iri göwrümli energetika, ulag we infrastruktura halkara taslamalarynyň durmuşa geçirilmegi bilen tanyşmakdan ybaratdyr diýip, Türkmenistanyň DIM-niň metbugat gullugy habar berdi.
Iş saparynyň dowamynda türkmen wekiliýeti Türkmenistan-Owganystan-Pakistan-Hindistan (TOPH) transmilli gaz geçirijisiniň taslamasynyň durmuşa geçirilmeginde möhüm tapgyr bolan Owganystanyň çägindäki Serhetabat-Hyrat böleginde gurluşyk işleriniň gidişi bilen tanyşdy.
Şeýle hem, wekiliýet Arkadagyň ak ýoly bilen optiki-süýümli aragatnaşyk geçirijisini we Turgundy demir ýol bekediniň gury portunda ammarlar toplumyny hem-de Serhetabat-Turgundy demir ýolunyň birinji tapgyrynyň Turgundy-Sanabar bölegini gurmak boýunça alnyp barylýan işleriň depginini synlamaga mümkinçilik aldy.
Şu ýylyň 11-nji sentýabrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň gatnaşmagynda Owganystanyň çägindäki bu taslamalara dabaraly ýagdaýda badalga berildi.
ORIENT
