Türkmenistan we BMG: durnukly ösüş ugrundaky hyzmatdaşlygyň täze tapgyryna tarap
13-nji dekabrda Türkmenistanyň Daşary işler ministrliginiň binasynda Türkmenistanyň Hökümeti bilen BMG-niň arasynda durnukly ösüş ugrunda 2021 – 2025-nji ýyllar üçin hyzmatdaşlygyň Çarçuwaly Maksatnamasynynyň Ýolbaşçy komitetiniň mejlisi geçirildi. Çäre utgaşykly görnüşde geçirilip, DIM-niň, ýurduň birnäçe ministrlikleriniň we pudak edaralarynyň wekilleri, BMG-niň Türkmenistandaky Hemişelik utgaşdyryjysy, BMG-niň düzüm birlikleriniň ýolbaşçylary gatnaşdylar.
Durnukly ösüş ugrunda hyzmatdaşlyk etmek boýunça Çarçuwaly maksatnamasynyň Türkmenistan bilen BMG-niň arasynda hyzmatdaşlygynyň ösüşini ulgamlaýyn esasda kesgitleýän esasy resminamadyr. Ol Durnukly ösüş maksatlaryna ýetmäge we halkara hyzmatdaşlygyny pugtalandyrmaga gönükdirilen orta we uzak möhletleýin strategiýalara esaslanýar.
Mejlisde häzirki meýilnamanyň ýerine ýetirilişine gutarnykly baha bermek, bäş sany ýöriteleşdirilen toparyň işiniň netijeleri we 2026–2030-njy ýyllar üçin hyzmatdaşlygyň indiki tapgyryna taýýarlyk barada BMG-nyň teklipleri ara alnyp maslahatlaşyldy.
Häzirki maksatnamany durmuşa geçirmekdäki üstünliklere we ony kämilleşdirmegiň geljegine aýratyn üns berildi. Türkmenistanyň Daşary işler ministri pudagara derejesinde tagallalary utgaşdyrmagyň möhümdigini nygtady we Daşary işler ministrliginiň ählumumy maksatlara ýetmäge gönükdirilen täze resminamanyň işlenip düzülmegine işjeň gatnaşmaga taýýardygyny tassyklady.
78490
