Serdar Berdimuhamedow nebitgaz senagaty we geologiýa işgärlerini hünär baýramçylygy bilen gutlady
Türkmenistanyň Prezidenti Serdar Berdimuhamedow 14-nji dekabrda bellenilýän ýurduň nebitgaz senagaty we geologiýa işgärlerine hünär baýramçylygy mynasybetli gutlag hatyny iberdi.
Döwlet Baştutany gutlag hatynda pudagyň hünärmenleriniň ýurduň ykdysadyýetini ösdürmäge goşýan goşandyny belledi. Olaryň zähmetiniň netijesinde täze nebitgazly ýataklaryň açylmagyny, Türkmenistan — Hytaý, Gündogar — Günbatar gaz geçirijilerini, gurluşygy alnyp barylýan Türkmenistan — Owganystan — Pakistan — Hindistan (TOPH) gaz geçirijisiniň gurluşygy ýaly ajaýyp üstünlikleriň gazanylandygyny nygtady. Şeýle hem, Prezident “Arkadagyň ak ýoly” diýip simwoligi adyna eýe bolan TOPH-iň möhüm bölegi bolan Serhetabat — Hyrat gaz geçirijisiniň taslamasyny durmuşa geçirmegiň möhümdigini belledi.
Serdar Berdimuhamedow nebitgaz pudagynyň eksport mümkinçiliginiň ösdürilmeginiň we köpugurly turbageçirijiler ulgamyny döretmek döwlet energetika syýasatynyň ileri tutulýan ugurlarynyň biridigini nygtady. Energetika howpsuzlygyny berkitmäge, sebitdäki ýurtlaryň abadançylygyny ýokarlandyrmaga we ykdysady taýdan durnukly gurşawy emele getirmäge aýratyn üns berilýär.
Nebitgaz ýataklary özleşdirilende, uglewodorod serişdeleri çykarylanda, gaýtadan işlenende hem-de sarp edijilere iberilende daşky gurşawy aýawly saklamagyň talaplaryny berjaý etmek, bu işleri ýokary ekologik kadalara laýyklykda amala aşyrmak, şeýle-de onuň howanyň üýtgemegine täsirini peseltmek öňde durýan möhüm wezipelerdir diýip, döwlet Baştutany belledi.
Prezident, Türkmenistanyň öz maksatlaryna ýetmek üçin uly göwrümli taslamalary durmuşa geçirip, energetika pudagyny işjeň ösdürmegini dowam etjekdirjekdigine ynam bildirdi. Sözüniň ahyrynda ähli pudagyň işgärlerine berk jan saglyk, maşgala abadançylygy hem-de möhüm we jogapkärçilikli işlerinde täze üstünlikler arzuw etdi.
ORIENT
