Türkmenistanyň ýokary okuw mekdebi okuw prosesine innowasion tehnologiýalary ornaşdyrmakda Fransiýanyň tejribesi bilen tanyşýar
2024-nji ýylyň 20-27-nji noýabry aralygynda Seýitnazar Seýdi adyndaky Türkmen döwlet mugallymçylyk institutynyň wekilleriniň düzümindäki türkmen wekiliýeti Fransiýada saparda boldy.
Amala aşyrylan sapar öňdebaryjy innowasion tehnologiýalary, emeli aň tehnologiýalary, maglumat goraglylygy bilen tanyşmaga, şeýle hem olary okuw-usulyýet, ylmy-barlag işlerine ornaşdyrmak tejribesini öwrenmäge gönükdirilendir.
Seýitnazar Seýdi adyndaky Türkmen döwlet mugallymçylyk institutynyň wekiliýeti Parižiň Sarbonna Uniwersitetine, Pariž Döwlet uniwersitetine hem-de fransuz paýtagdyndaky Amerikan işewür-mekdebine baryp görüp, ol ýerde okuw prosesini gurnamak, okuw prosesine emeli aň tehnologiýalary ornaşdyrmak, inženerçilikde we fizikada 3D modelirleme işi bilen tanyşdy. Şeýle-de, wekiliýetiň agzalaryna robototehnika boýunça ýörite okuw maksatnamalary görkezildi.
Seýitnazar Seýdi adyndaky Türkmen döwlet mugallymçylyk institutynyň professor-mugallymlarynyň amala aşyran saparynyň bu ýokary okuw mekdebiniň dünýä standartlaryna laýyklykda täze toplumynyň gurulmagy babatynda has hem möhüm bolandygyny bellemelidir.
ORIENT news
