Türkmenistan bilen Iordaniýanyň arasyndaky söwda we ykdysady gatnaşyklarda täze ädimler
Ykdysady, ylmy we tehniki hyzmatdaşlyk boýunça bilelikdäki hökümetara toparyň döredilmegi, Türkmenistan bilen Iordaniýanyň Söwda-senagat edaralarynyň arasynda işewürlik işjeňligini höweslendirmek üçin hyzmatdaşlygyň ýola goýulmagy 27-nji noýabrda iki ýurduň Daşary işler ministrlikleriniň derejesinde wideoaragatnaşyk ulgamy arkaly geçirilen türkmen-iordan geňeşleriniň esasy mowzuklarynyň biri boldy.
Geňeşleriň dowamynda diplomatlar syýasyda, ykdysadyýetde we ynsanperwer ugurlarda ikitaraplaýyn we köptaraplaýyn hyzmatdaşlygy ösdürmek ýaly köp sanly meseleleri ara alyp maslahatlaşdylar.
Taraplar özara düşünişmegi we hyzmatdaşlygy güýçlendirmek üçin esas hökmünde iň ýokary derejede yzygiderli dialogyň we daşary syýasat edaralarynyň arasyndaky işjeň gatnaşyklaryň möhümdigini bellediler.
Geňeşmeleriň çäginde halkara we sebit gün tertibindäki meselelere şeýle hem BMG-nyň meýdançalarynda özara gatnaşyklaryň geljegine aýratyn üns berildi. Parlamentara gatnaşyklary ýola goýmak ara alyp maslahatlaşmalaryň esasy ugrynyň arasynda görkezildi.
Gepleşikleriň aýratyn bölegi medeni, bilim we syýahatçylyk alyş-çalyşlaryny, şeýle hem saglygy goraýyş pudagyndaky taslamalary giňeltmek baradaky başlangyçlary boldy diýip, Türkmenistanyň DIM-iň metbugat beýanatynda habar berilýär.
ORIENT
