Türkmen halkynyň Milli Lideri “Hakyda göwheri” atly täze kitaby bilen tanyşdyrdy
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow “Hakyda göwheri” atly täze kitaby bilen tanyşdyrdy.
Resmi türkmen metbugat gullugynyň habar bermegine görä, ýakyn günlerde kitap neşir edilip, giň halk köpçüligine ýetiriler.
Tanyşdyrylyş dabarasy Halk Maslahatynyň Diwanynyň iş dolandyrjysy, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň wise-prezidenti R.Bazarowyň hem-de Türkmenistanyň Ylymlar akademiýasynyň prezidenti A.Aşyrowyň gatnaşmagynda iş maslahatynyň çäklerinde geçirildi.
Türkmen halkynyň Milli Lideri kitabyň üstünde alyp baran işine öz zähmet rugsadyny – dynç alyş günlerini bagyşlady: kän oýlanyp, şöhratly taryhymyz hakynda toplan ençeme maglumatlaryny kagyza geçirdi.
“Pederlerimiz şöhratly geçmiş taryhymyzyň biziň günlerimize gelip ýetmeginde uly işleri bitirdiler. Häzirki nesilleriň borjy bolsa ony indiki nesillere ýetirmekdir” – diýip, Gahryman Arkadagymyz belledi, “Milliligimizi unutman, hemişe ata-babalarymyzyň ýoluna eýermelidiris, şol bir wagtda döwür bilen aýakdaş gitmelidiris” – diýip, türkmen halkynyň Milli Lideri nygtady.
Gahryman Arkadagymyzyň aýtmagyna görä, her birimiz baý edebi mirasymyza, berkarar döwletimiziň gazanýan ösüşlerine buýsanmaga hem guwanmaga haklydyrys, çünki biz beýik döwletdiris, beýik döwletiň bolsa beýik milleti bardyr!
Iş maslahatyna gatnaşyjylar Alym Arkadagymyzy bu şanly waka bilen gutlap, ajaýyp kitaplarynyň höwriniň köp bolmagyny arzuw etdiler.
ORIENT news
