Aşgabatda Hytaýyň Daşary işler ministrliginiň ýörite wekili owgan meseleleri barada pikir alyşdy
21-nji noýabrda Türkmenistanyň DIM-de Daşary işler ministriniň orunbasary Serdar Muhammetdurdyýew bilen Hytaý Halk Respublikasynyň Daşary işler ministrliginiň Owganystanyň işleri boýunça ýörite wekili Ýue Sýaoýunyň ýolbaşçylygyndaky wekiliýetiň arasynda duşuşyk geçirildi.
Gepleşikleriň dowamynda uzak möhletleýin, özara bähbitlilige esaslanýan Türkmenistan bilen Hytaýyň arasyndaky strategiki hyzmatdaşlygyň esasy taraplary ara alnyp maslahatlaşyldy. Taraplar ozal gazanylan ylalaşyklaryň durmuşa geçirilişine aýratyn üns berdiler we ikitaraplaýyn gün tertibindäki häzirki meseleler barada pikir alyşdylar.
Türkmenistanyň we Hytaýyň döwlet Baştutanlarynyň arasyndaky duşuşyklaryň döwletara dialogyň ösmeginde möhüm orun eýeleýändigi nygtaldy. Bu duşuşyklar türkmen-hytaý gatnaşyklaryny pugtalandyrmak üçin berk esas döredýär we bilelikdäki taslamalaryň işjeňleşmegine goşant goşýar.
Owganystanyň durnukly dikeldilmegini üpjün etmek meselelerine aýratyn üns berildi. Türkmenistan bu ýurduň durnukly ykdysady we durmuş ösüşini goldamaga gönükdirilen köptaraplaýyn meýdançalaryň ähmiýetini belledi. Şunuň bilen baglylykda Owganystan bilen goňşy döwletleriniň Daşary işler ministrleriniň Aşgabatda geçiriljek 5-nji duşuşygyna taýýarlyk işleri we ýakyn wagtda geçiriljek gepleşikleriň möhüm taraplaryny ara alyp maslahatlaşdylar.
Söhbetdeşler Owganystana goldaw bermek üçin bilelikdäki işleri dowam etdirmek barada umumy garaýyşlary beýan etdiler. Hoşniýetli goňşuçylyk we dostluk ýörelgelerini goldaýan Türkmenistan we Hytaý goňşy döwletiň ykdysady taýdan dikelmegine goşant goşmaga taýýardyklaryny tassykladylar.
ORIENT
