“Galkynyş” gaz käninde gazyň täze senagat ähmiýetli akymy alyndy
“Galkynyş” gaz käniniň 265-nji önümçilik guýusynda dürli çuňluklardan tebigy gazyň täze senagat ähmiýetli akymy alyndy.
Buraw işleri 4485 metre çenli çuňlukda üstünlikli geçirildi we 4417-4281 metr we ýerasty 4266-4226 metr aralyklardaky gatlaklarda gazyň akymy tapyldy.
Bir gije-gündiziň dowamynda 2 million kub metr çykymy bolan guýunyň önümçilik mukdarynyň yzygiderli ýokarlanjakdygy gürrüňsizdir, munuň özi ýurdumyzyň çäklerinde bar bolan “mawy ýangyja” baý känleriň işiniň häzirki döwrüň talabyna laýyk derejede alnyp barylýandygynyň ýene bir subutnamasydyr diýip, TDH habar berýär.
Burawçylaryň örän netijeli, ýöne şol bir wagtyň özünde hünärmenlerden iň ýokary hünär talap edýän guýy gurmak üçin örän çylşyrymly tehnologiýalary ulanýandygy bellärliklidir.
Dünýä ýüzünde gorlary boýunça “supergigant” we tehniki görkezijiler taýdan “unikal” hasaplanýan “Galkynyş” gaz käni häzirki wagtda “mawy ýangyjyň” ygtybarly çeşmesi bolup hyzmat edýär.
“Galkynyş” gaz käninden başga-da, ýurtda ýene-de onlarça gaz känleri özleşdirilýär, şol sanda Hazar deňziniň türkmen böleginde ýalpaklygynda, gazdan başga-da subut edilen nebit gorlary bar. Bu bolsa tebigy gazyň gorlary boýunça dünýäde dördünji orny eýeleýän Türkmenistanyň energiýa kuwwatlynyň derejesini tassyklaýar.
ORIENT
