Türkmenistan we Eýran maglumat tehnologiýasy pudagynda hyzmatdaşlygy ösdürmegi ara alyp maslahatlaşdylar
Eýranyň Aragatnaşyk ministriniň orunbasary, “Infrastructure Communications” kompaniýasynyň Baş direktory Behzad Akbari Aşgabatda eden sapary wagtynda Türkmenistanyň Ministrler Kabinetiniň ýanyndaky Ulag we kommunikasiýalar agentliginiň Baş direktory Mämmethan Çakyýew we “Türkmenaragatnaşyk” agentliginiň başlygy Hajymyrat Hudaýgulyýew bilen gepleşikleri geçirdi.
Eýranyň köpçülikleýin habar beriş serişdeleriniň habaryna görä, duşuşykda Eýranda sanly infrastrukturany ösdürmekdäki öňegidişlikler bilen tanyşdyryldy şeýle hem özara gatnaşyklara, şol sanda Türkmenistanyň we Eýranyň çäginden ulag gatnawyny giňeltmek mümkinçiliklere seredildi.
Iki ýurduň hem amatly geografiki ýerleşişi göz öňüne tutup, sebitde sanly infrastrukturanyň ösmeginde esasy orny eýeläp biljekdigi bellenildi.
Taraplar bu meseleler boýunça iş tertibinde bilelikde işlemek barada ylalaşdylar. Behzad Akbari, Eýranyň Aragatnaşyk ministri Seýedastar Haşeminiň adyndan 3-6-njy ýanwarda Tähranda geçiriljek Halkara Telekommunikasiýa sergisine Türkmenistanyň aragatnaşyk pudagynyň ýolbaşçylaryny çagyrdy.
“Infrastructure Communications” kompaniýasynyň Baş direktory Behzad Akbari Aşgabatda geçirilen “Türkmental-2024” atly halkara sergisine baryp gördi.
ORIENT
