Aşgabat we Daşkent ylalaşyklaryň ýerine ýetirilişine seretdiler
15-nji noýabrda, anna güni Daşkent şäherinde Türkmenistanyň Daşary işler ministriniň orunbasary A.Gurbanow Özbegistan Respublikasynyň Daşary işler ministri Bahtiýor Saidow bilen duşuşdy.
Söhbetdeşligiň barşynda diplomatlar iň ýokary derejedäki dostlukly we ynamdar syýasy gepleşiklere esaslanýan ikitaraplaýyn gatnaşyklaryň depginli ösüşini bellediler. Şu nukdaýnazardan, Türkmenistanyň Prezidentiniň, şeýle hem türkmen halkynyň Milli Lideri, Türkmenistanyň Halk Maslahatynyň Başlygynyň we Özbegistan Respublikasynyň Prezidentiniň arasynda şu ýylda geçirilen duşuşyklaryň dowamynda gazanylan ylalaşyklaryň durmuşa geçirilişini ara alyp maslahatlaşdylar diýip, Türkmenistanyň DIM-niň metbugat gullugy habar berýär.
Söwda-ykdysady ugurdaky gatnaşyklary pugtalandyrmaga we ýangyç-energetika pudagynda özara gatnaşyklary çuňlaşdyrmagaaýratyn üns berildi. Şunuň bilen baglylykda, Söwda-ykdysady, ylmy-tehniki we medeni hyzmatdaşlyk boýunça bilelikdäki hökümetara toparynyň hem-de iki ýurduň milli önümleriniň sergilerini geçirmegiň ähmiýeti bellenildi.
Ozal 20–21-nji noýabrda Lebap welaýatynyň Türkmenabat şäherinde Özbek harytlarynyň sergisiniň we Türkmenistan bilen Özbegistanyň sebitara forumynyň geçiriljekdigi habar berildi.
ORIENT
