“Owgantelekom”: “Türkmentelekom” bilen hyzmatdaşlygy 20 ýylyň dowamynda ösdürilip gelinýär”
Düýn Aşgabatdaky “Türkmentel-2024” atly sergisiniň we maslahatynyň çäklerinde “Owgantelekom” kompaniýasynyň wekili Mohammad Zafar “Türkmentelekom” elektroaragatnaşyk kompaniýasy bilen köpýyllyk hyzmatdaşlygy barada öz pikirleri bilen paýlaşdy. Ol “Owgantelekom”-yň bu çärä her ýyl gatnaşmagy Türkmenistanyň tehnologiýa ösüşini synlamaga mümkiçilik berýändigi barada belledi.
“Türkmentelekom” bilen bizi, takmynan, 20 ýylyň dowamyndaky netijeli hyzmatdaşlyk birleşdirýär – diýip, Mohammad Zafar aýratyn belledi. – Bizde göni optiki aragatnaşyk ýola goýulan, we biz bilelikdäki taslamalaryň mundan beýläk-de giňeldilmegine ynam bildirýäris”.
Onuň aýtmagyna görä, ýakyn geljekde TOPH taslamasy we demir ýol ugurlarynyň gurulmagy ýaly täze başlangyçlar gatnaşyklary pugtalandyrmaga has uly mümkinçilikleri açyp berer. Bu bolsa sebitleriň arasynda ösüp barýan infrastruktura gatnaşyklarynyň zerurlyklaryny kanagatandyrmak üçin häzirki zaman aragatnaşyk ugurlarynyň, hususan-da, optiki simleriň ösüşini talap edýär.
Zafar munuň ýaly taslamalar arkaly “Türkmentelekom” we “Owgantelekom” hyzmatdaşlygy işjeňleşdirmegi dowam edip, sebitde telekommunikasiýa hyzmatlarynyň gowulandyrylmagyna ýardam edip biljekdigi barada nygtap geçdi.
