Gazagystan we Özbegistan ilkinji demir ýol syýahat ugruny işe girizýärler
Gazagystan we Özbegistan “Ýüpek ýoly” atly ilkinji demir ýol syýahat ugruny işe girizýärler. Bu barada Gazagystanyň Syýahatçylyk we sport ministrligine salgylanyp, respublikanyň “Kazinform” halkara habarlar agentligi belleýär.
“Almaty-Türkestan-Daşkent-Almaty” ugry boýunça ilkinji gatnaw eýýäm 2024-nji ýylyň 16-njy noýabrynda amala aşyrylar.
Dört günüň dowamynda syýahatçylaryň gadymy şäherleriň gurşawyna aralaşyp, Beýik Ýüpek ýolunyň ugry bilen syýahat etmäge mümkinçiligi bolar. Bu ugur Türkestanyň we Daşkendiň esasy ajaýyplyklaryny öz içine alýar.
Hususan-da, syýahatçylar Merkezi Aziýanyň çägindäki iň gadymy şäherleriň biri bolan Otyrar şäherini görüp bilerler. Şäher öz döwründe möhüm söwda merkezi hökmünde çykyş edýärdi.
Şeýle-de, syýahat ugrunyň çäklerinde Arystan-baba kümmetine, “Azret-Sultan” taryhy-medeni goraghana-muzeýine, Merkezi Aziýada iri syýahatçylyk toplumy bolan “Kerwen-Saraýa” baryp bolar.
Daşkentde syýahata gatnaşyjylar diňe bir şäheriň taryhyna aralaşman, eýsem özbek paýtagtynyň häzirki zaman ösüşi bilen tanyşmaga mümkinçilik alarlar.
Syýahatçylaryň rahatlyklary üçin ýol beledi, iýmitlendirme, ulag hyzmatlary we giriş biletler göz öňünde tutulan.
Halkara syýahat ugruny “TauKomek Travel”, “Туран Казахстан Тревел”, “Grand Soluxe Travel Company”, “SkyWay Travel”, “Kompas”, “Khan Turan Travel” bilen hyzmatdaşlykda “Ýolagçy geçirmeleri” paýdarlar jemgyýeti işe girizýärler. “Kazakh Tourism” paýdarlar jemgyýeti bu ugruň halkara derejesinde ösdürilmegine ýradam eder.
Bilelikdäki tagallalaryň netijesinde iki ýurdy birleşdirýän özboluşly demir ýol ugruny döretmäge başartdy. Syýahatlar baý ruhy we taryhy mirasy barada bilesi gelýän biziň raýatlarymyz we beýleki ýurtlaryň syýahatçylary üçin has oňaýly we elýeterli bolar. Bu bolsa Gazagystanyň we Özbegistanyň arasynda syýahatçylygyň ösdürilmeginde we medeni gatnaşyklaryň pugtalandyrylmagynda möhüm ädimdir, - diýip, Gazagystanyň Syýahatçylyk we sport ministri Ýeržan Ýerkinbaýew belledi.
ORIENT news
