Garaşylýan DIALOGUE: “Türkmentel-2024”-de geçiriljek gepleşikler
2024-nji ýylyň 14-16-njy noýabry aralygynda Aşgabat şäherinde “Türkmentel-2024” atly Halkara sergisi we ylmy maslahaty geçiriler. Çäräniň guramaçylary hökmündeDialogue Events Ltd. britan kompaniýasynyň hyzmatdaşlygynda “Türkmenaragatnaşyk” agentligi hem-de Türkmenistanyň Söwda-senagat edarasy çykyş edýär.
“Türkmentel-2024” atly Halkara sergisine we ylmy maslahatyna SpaceX, Samsung, Huawei, Amazon, Nokia, Eastwind, Lenovo, Motorola Solutions, Bosch, Delta Telecom, Thales ýaly dünýä belli kompaniýalaryň ýolbaşçylary we wekilleri gatnaşar.
Täze tehnologiýalar, intellektual robotlar, wirtual kömekçiler, sanly hyzmatlar, emeli aňyň mümkinçilikleri, kiberhowpsuzlyk ugurlary boýunça tejribe we pikir alyşmak, ikitaraplaýyn we köptaraplaýyn halkara hyzmatdaşlyklary ýola goýmak forumyň esasy wezipeleri bolar.
Forumyň çäklerinde “Türkmenaragatnaşyk” agentliginiň bilen daşary ýurt kompaniýalary we halkara guramalarynyň arasynda 100-den gowrak duşuşyklaryň geçirilmegine garaşylýar.
Amazon kompaniýasynyň dünýä söwdasy we taslamalary dolandyrmak boýunça başlygy Jef Kiýetzmann, Dell kompaniýasynyň Gazagystandaky we Merkezi Aziýadaky wekiliýetiniň başlygy Nurlan Sadykow, Huawei kompaniýasynyň Ýakyn Gündogar we Merkezi Aziýa sebitlerinde maglumat-kommunikasiýa tehnologiýalary, marketing we satuw boýunça prezidenti Allen Tang, Nokia Solutions and Networks Branch Operations OY kompaniýasynyň Merkezi Ýewropa sebiti boýunça wise-prezidenti Piter Wukowits, Samsung Electronics kompaniýasynyň GDA ýurtlary boýunça başlygy Li Çunsun ýaly we başga-da birnäçe pudagyň liderleri bilen duşuşyklara garaşylýar.
Forum innowasion ösüşleriň meýdançasy hökmünde aragatnaşyk pudagyny ösdürmekde täze halkara hyzmatdaşlyklaryň tapgyryna badalga berer.
