BMGÖM-nyň Türkmenistandaky wekiliýeti Daşoguz welaýatynda ekologiýa taslamalaryny ara alyp maslahatlaşdy
Birleşen Milletler Guramasynyň Ösüş maksatnamasynyň Türkmenistandaky Hemişelik wekili Narine Saakýan 10-11-nji noýabr aralygynda Daşoguz welaýatyna iki günlük iş sapary amala aşyryp, Aral deňziniň sebitinde durnukly ösüş we ekologiýany goramak boýunça häzirki taslamalary we geljekki meýilnamalary ara alyp maslahatlaşdy.
Saparyň dowamynda Saakýan Daşoguz welaýatynyň häkimi Döwletgeldi Babaýew we beýleki ýerli wezipeli adamlar bilen duşuşdy. Daşky gurşawyň durnuklylygyny güýçlendirmek, suw dolandyryşyny gowulandyrmak we oba hojalygynyň durnukly tejribesini ösdürmek baradaky tagallalar duşuşygyň esasy mowzugy boldy. Saakýan BMGÖM-iň sebitiň dolandyryş edalary bilen daşky gurşaw meselelerini, şol sanda Aral deňziniň çökgünliginiň netijeleri we howanyň üýtgemegi bilen baglanyşykly meseleleri çözmekde dowamly hyzmatdaşlygyň möhümdigini aýtdy diýip, BMGÖM-iň metbugat beýanatynda habar berilýär.
Ekologiýa we durnukly ösüş festiwaly
Şeýle hem bu sapar Daşoguz welaýat kitaphanasynda gurnalan “Ekologiýa medeniýeti” atly eko-festiwalyna gatnaşmagy hem öz içine aldy. Festiwalda durnukly ösüş we ekologiýa pudagyndaky taslamalar, şeýle hem ekologiýa taýdan arassa önümleriň we adaty senetleriň sergisi görkezildi. Narine Saakýan, bu çäräniň Türkmenistanyň ýaşlar başlangyçlaryny we medeni mirasyny wagyz etmekde ähmiýetini belläp, döredijilikli ykdysadyýetiniň ýurduň durnukly ösüşindäki ornuna ünsi çekdi.
Suw serişdeleri we bag ekmek boýunça okuw maslahaty
Saparyň ikinji gününde Aral sebitinde suw serişdelerini dolandyrmak boýunça okuw maslahaty geçirildi. Gatnaşanlar suwy durnukly oba hojalygy üçin ulanmagyň iň oňat usullaryny ara alyp maslahatlaşdylar. Şeýle hem, saparyň çäginde BMGÖM-nyň wekiliýeti Gaplaňgyr döwlet goraghanasyna baryp, bag ekmek çäresine gatnaşdy.
Saparyň ahyrynda wekiliýet Görogly etrabynda durnukly ýer dolandyryşy we daşky gurşawy goramak boýunça BMGÖM-nyň bilelikdäki taslamalarynyň netijeleri bilen tanyşdy.
ORIENT
