BMG-niň Bosgunlaryň işi boýunça Ýokary komissarynyň müdirligi Türkmenistanyň raýatsyzlygy ýok etmek ugrundaky tagallalaryna ýokary baha berýär
7-nji noýabrda, şişenbe güni Türkmenistanyň Daşary işler ministri Raşid Meredow iş sapary bilen Türkmenistana gelen BMG-niň Bosgunlaryň işi boýunça Ýokary komissarynyň kömekçisi Ruwendrini Menikdiwela bilen duşuşdy.
Taraplar Türkmenistan bilen BMG-niň Bosgunlaryň işi boýunça Ýokary komissarynyň müdirliginiň arasyndaky (UNHCR) uzak möhletleýin üstünlikli hyzmatdaşlygyny ara alyp maslahatlaşdylar şeýle hem raýatlygy ýok etmekde ýurduň möhüm üstünliklerini bellenip geçdildi. Bosgunlar we raýatlygy bolmadyk adamlar baradaky BMG-niň esasy hukuk resminamalarynyň gatnaşyjysy bolmak bilen Türkmenistan 32 müňden gowrak bosgun we raýatlygy bolmadyk adamlaryň raýatlyga kabul edip, raýatsyzlygy ýok etmekde nusga alarlyk netijeler gazandy.
Türkmenistanyň Hökümeti bilen UNHCR-iň Merkezi Aziýa boýunça sebitleýin edarasynyň ýyllyk iş meýilnamalarynyň çäginde bilelikdäki işleriň gelejegine aýratyn üns berildi.
Bosgunlaryň toparynyň Ýapyk binalarda we söweş sungaty boýunça V Aziýa oýunlaryna ilkinji gezek gatnaşmaga çagyrmak babatyndaky Türkmenistanyň başlangyjy nygtaldy. Bosgun toparlarynyň türgenleşik we sport lagerleri üçin zerur şertleri döretmäge Türkmenistanyň taýýarlygy beýan edildi. Agzalanlar Türkmenistanyň başlangyjy bilen kabul edilen “BMG-niň oýunlary” atly Kararnamanyň düzgünleriniň iş ýüzünde durmuşa geçirilmegi bilen utgaşýar.
2024-nji ýylyň 14-nji oktýabrynda Ženewada geçirilen BMG-niň Bosgunlaryň işi boýunça Ýokary komissarynyň Maksatnamasynyň Ýerine ýetiriji komitetiniň 75-nji sessiýasynyň umumy mejlisinde Türkmenistanyň raýatsyzlygy ýok etmek boýunça Ählumumy bileleşige goşuljakdygynyň mälim edilendigi bellenildi. Bu waka raýatsyzlyk boýunça meseläni çözmekde halkara hyzmatdaşlygyny berkitmek üçin möhüm ädim boldy.
Duşuşygyň ahyrynda taraplar, sebitdäki we onuň çäginden daşardaky bosgunlar bilen baglanyşykly meseleleri çözmek boýunça tagallalary utgaşdyrmagyň möhümdigini bellediler. Şeýle hem 2024-nji ýylyň 8-nji noýabrynda Aşgabat şäherinde geçiriljek raýatsyzlygyň soňuna çykmak boýunça ministrler derejesindäki sebitleýin maslahatynyň ähmiýetine ýokary baha berildi. Bu tejribe alyşmak we sebitdäki hyzmatdaşlygy berkitmek üçin möhüm meýdança öwrüler.
ORIENT
