Türkmenistan bilen Lihtenşteýniň arasynda diplomatik gatnaşyklary ýola goýuldy
Türkmenistan bilen Lihtenşteýn Knýazlygynyň arasynda diplomatik gatnaşyklary ýola goýmak hakynda Bilelikdäki Beýannama gol çekildi. Dabara 1-nji noýabrda Nýu-Ýork şäherinde Türkmenistanyň Birleşen Milletler Guramasynyň ýanyndaky hemişelik wekilhanasynyň edara binasynda geçirildi.
Gol çekişlik dabarasyndan öň Türkmenistanyň BMG-niň ýanyndaky hemişelik wekili Aksoltan Ataýewa bilen Lihtenşteýniň BMG-niň ýanyndaky hemişelik wekili Kristian Wenaweseriň arasynda söhbetdeşlik geçirildi diýip, duşenbe güni Türkmenistanyň DIM-niň metbugat gullugy habar berdi.
Diplomatlar iki ýurduň dostlukly gatnaşyklary berkitmäge we ikitaraplaýyn syýasy, ykdysady we ynsanperwer hyzmatdaşlygy ösdürmäge ygrarlylygyny tassykladylar, şeýle hem halkara guramalaryň, ilkinji nobatda BMG-niň çäginde özara gatnaşyklary giňeltmegiň ähmiýetini bellediler.
Taraplar BMG-niň gün tertibiniň Türkmenistan we Lihtenşteýn Knýazlygy üçin gyzyklanma bildirilýän meselelerini, hususan-da parahatçylygy we ynanşmagy berkitmek, öňüni alyş diplomatiýasynyň, halkara sport gatnaşyklarynyň ilerledilmegi we durnukly ösüş bilen baglanyşykly beýleki meseleleri ara alyp maslahatlaşdylar.
ORIENT news
