“Casio” stresden aýrylmak üçin ýumşak robot-ýoldaşy Moflini tanyşdyrdy
“Casio” emosional goldawy we stresi aýyrmak üçin Moflin atly täze robot haýwanyny döredenligi barada habar berdi. Ýaponiýaly startap “Vanguard Industries” bilen bilelikde işlenip düzülen Moflin “Sony Aibo” ýaly beýleki robot haýwanlardan tapawutlanýar hem-de hereketine däl-de, duýujylyk (syzyjylyk) täsirine ünsi jemleýär.
Moflin – bu kellesini we bedenini herekete getirip bilýän kiçijik, ýumşak robot. Ol eliňde tutulanda gujaklamaga öýkünýär, ýakynlyk we rahatlyk duýgusyny döredýär. Moflini aýratynlaşdyrýan zat, ulanyjynyň özara gatnaşygy esasynda üýtgeýän öz simulýasiýa duýgularyny we şahsyýetini ösdürmek ukybydyr. Robot bilen yzygiderli täsirleşmek, bagtyň we asudalygyň alamatlaryny görkezmäge kömek edýär, şol bir wagtyň özünde üns bermezlik onuň aladaly we gynandyryjy bolmagyna sebäp bolup biler.
Eýeleri Mofliniň emosional ýagdaýyna ýörite ykjam programma arkaly gözegçilik edip bilerler, bu hem robot tarapyndan döredilen sesleriň sesini sazlamaga mümkinçilik berýär. Moflin ýörite oturgyçda zarýad alýar, bir doly zarýadda bäş sagada çenli işleýär, doly zarýad üçin bolsa üç ýarym sagat töweregi wagt alýar.
“Casio” Moflin üçin 59,400 ýapon ýeni (takmynan 398 ABŞ dollary) bahasy bilen öňünden sargytlary açdy. Robot 2024-nji ýylyň 7-nji noýabrynda satuwa çykarylar. Şeýle hem, kompaniýa her ýyl 6600 ýen (takmynan 44 ABŞ dollary) “Club Moflin” abuna ýazylyşyny hödürleýär, bu tehniki hyzmat we tüýüni çalyşmak üçin arzanladyşlary öz içine alýar.
ORIENT news
