YÖB we Türkmenistan üç hassahananyň gurluşygyny maliýeleşdirmek barada ylalaşyk baglaşdy
Yslam Ösüş Banky (YÖB) we Türkmenistan, ýurtda onkologiýa kesellerini bejermäge ýöriteleşen üç sany häzirki zaman lukmançylyk merkeziniň gurluşygy üçin 156,3 million dollarlyk taryhy ylalaşyga gol çekdi.
Maliýeleşdirmek boýunça ylalaşyga Waşingtonda Türkmenistanyň Döwlet daşary ykdysady iş bankynyň (YÖB Türkmenistandan dolandyryjysy) Rahymberdi Jepbarow we YÖB-nyň prezidenti Muhammad Al Jasser gol çekdi.
Taslamanyň umumy bahasy 259 million ABŞ dollar. Taslamanyň çäginde 11,750 hassa öňdebaryjy onkologiki hyzmatlary bermek üçin Balkanabatda, Türkmenabatda we Maryda 3 sany häzirki zaman hassahanasy gurlar.
Gol çekişme Halkara Walýuta Gaznasynyň we Bütindünýä Bankynyň ABŞ-nyň Waşington şäherinde 2024-nji ýyldaky ýyllyk ýygnaklarynyň çäginde geçirildi.
Ara alyp maslahatlaşmalaryň dowamynda taraplar dowam edýän çuňňur hyzmatdaşlygy has jikme-jik gözden geçirdiler we 2024–2027-nji ýyllar üçin “YÖB agza ýurtlar bilen hyzmatdaşlygyň strategiýasy” resminamasynyň çäginde bilelikdäki tagallalary dowam etdirmek barada ylalaşdylar diýip, bankyň metbugat beýanatynda habar berilýär.
Şeýle hem, ýaşyl energiýa infrastruktura taslamalary üçin tehniki kömek maksatnamasy we hususy pudak bilen mundan beýläkki gatnaşyklar barada pikir alyşdylar.
YÖB Türkmenistanyň dürli pudaklarda, esasanam energiýa, saglygy goraýyş, ulag we söwda ösüşini maliýeleşdirmäge möhüm goşant goşdy. YÖB topary esasan, Türkmenistanda sebit gatnaşyklaryny pugtalandyrýan we ýurduň eksport mümkinçiligini ýokarlandyrýan iri taslamalara goldaw berdi, olaryň arasynda: Bereket-Etrek demir ýol taslamasy, TOPH gaz geçirijisi we telekommunikasiýa ulgamyny gowulandyrmak boýunça taslamasy.
2024-nji ýylyň iýun aýynda Yslam Ösüş Bankynyň Ýerine ýetirijiler müdiriýetiniň geňeşi, Türkmenistanda üç sany onkologiýa hassahanasynyň gurluşygy üçin maliýeleşdiriş taslamalaryny tassyklady.
2024-nji ýylyň sentýabr aýynda Muhammad Al Jasseriň ýolbaşçylygyndaky YÖB wekiliýeti Aşgabat şäherine bolup, ýokary derejede gepleşikleri geçirdi.
ORIENT news
