Türkmenistanyň Halk Maslahatynyň Başlygy zähmet rugsadyna çykar
Türkmenistanyň Halk Maslahatynyň Başlygy 1-nji noýabryndan başlap zähmet rugsadyna çykar. Bu barada anna güni geçirilen Ministrler Kabinetiniň mejlisinde aýdyldy. Mejlise türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow hem gatnaşdy.
Sentýabr aýynda Türkmenistanyň Halk Maslahatynyň mejlisi ýokary derejede geçirildi şeýle-de ýakynda dünýä jemgyýetçiligi tarapyndan ýokary baha berlen, türkmen halkynyň akyldar şahyry Magtymguly Pyragynyň doglan gününiň 300 ýyllygyna bagyşlanan “Döwürleriň we siwilizasiýalaryň özara arabaglanyşygy – parahatçylygyň we ösüşiň binýady” atly halkara forumy geçirildi.
“Türkmenistanyň Halk Maslahaty bu çärelere taýýarlyk görmek we ýokary derejede geçirmek boýunça guramaçylyk tarapdan köp işleri alyp bardy. Şu nukdaýnazardan türkmen halkynyň Milli Lideri ýokardaky agzalan çärelere taýýarlyk görmek bilen bagly awgust aýynda zähmet rugsadyny almandygy sebäpli, 1-nji noýabrdan zähmet rugsadyna çykmak barada Türkmenistanyň Prezidentine ýüzlendi” diýip, TDH habar berýär.
Prezident Serdar Berdimuhamedow Türkmenistanyň Halk Maslahatynyň Başlygynyň şu ýylyň 1-nji noýabryndan başlap zähmet rugsadyna çykmagy bilen bagly meseläni goldady diýip, maglumatda aýdylýar.
