Türkmen ilçisi Kiýewde Ukrainanyň Şäheri sosial-ykdysady taýdan ösdürmek boýunça ylmy-barlag instituty” ylmy-barlag edarasynyň direktory bilen duşuşdy
2024-nji ýylyň 23-nji oktýabrynda ilçi T.Ataýewiň “Şäheri sosial-ykdysady taýdan ösdürmek boýunça ylmy-barlag instituty” ylmy-barlag edarasynyň direktory Sergeý Pawlowskiý bilen duşuşygy geçirildi. “Şäheri sosial-ykdysady taýdan ösdürmek boýunça ylmy-barlag instituty” ylmy-barlag edarasy Kiýew şäheriniň Geňeşiniň we Kiýew şäheriniň döwlet administrasiýasynyň düzüminde esasy ylmy-barlag edara bolup, ol Ukrainanyň paýtagtyny sosial-ykdysady taýdan ösdürmek boýunça ykdysady, informatika we sosiologiýa ugurlary boýunça ylmy-barlag işlerini geçirýär.
S.Pawlowskiý bu institutyň alyp barýan işi barada aýdyp, Ukrainadaky ähli ýokary okuw jaýlaryndan hünärmenleri bir ýere jemlemek arkaly şäheri ösdürmek maksady bilen ylmy nukdaýnazardan çemeleşmeleri alyp barýandygyny habar berdi. Şeýle hem, Ukrainanyň ýokary okuw jaýlarynda şäheri ösdüriş fakultetlerini döretmek boýunça teklipleriň üstünde hem işlenilýändigini mälim etdi.
Agzalanlar bilen baglylykda, direktor Türkmenistanyň şäher ösdüriş edaralary we bu ugurda ýöriteleşdirilen ýokary okuw jaýlary bilen hyzmatdaşlyk etmäge taýýardygyny, hem-de olaryň wekillerini özleri tarapyndan guralýan maslahatlaryna we çärelere gatnaşmaga çagyrdy.
Ilçi T.Ataýew Aşgabat şäherini yzygiderli ösdürmäge we halkyň ýaşaýyş-durmuş derejesini has-da ýokarlandyrmaga gönükdirilen maksatnamalaryň üstünlikli durmuşa geçirilýändigi barada maglumatlary ukrain tarapyna ýetirdi. Bu ugurda paýtagtymyzda medeni-durmuş, önümçilik maksatlary desgalaryň sanynyň yzygiderli artdyrylýandygy we ýakynda gurlup ulanylmaga berlen durmuş maksatlary desgalaryň üstüniň täze saglygy goraýyş desgalary bilen doldurylandygyny barada hem bellenildi.
Şeýle hem, ýurdumyzda “akylly” şäher konsepsiýasyna laýyklykda döredilen Arkadag şäheri barada gürrüň berildi, hem-de onuň gurluşygynyň ikinji tapgyrynyň alnyp barylýandygy bellenildi. Bu şäherde ekologiýa taýdan arassa inženerçilik ulgamlary giňden ornaşdylyp, dürli maksatly desgalar yzygiderli gurulýandygyny hem aýdyldy.
Duşuşygyň netijesi boýunça taraplar bu ugurda iki ýurduň we olaryň paýtagtlarynyň arasynda ikitaraplaýyn hyzmatdaşlyk boýunça gepleşikleri işjeňleşdirmäge gyzyklanma bildirdiler.
ORIENT news
