Aşgabatda türki dünýäsiniň ýazyjylarynyň forumy geçirildi
Aşgabatda 18-19-njy oktýabr aralygynda “Änew — türki dünýäniň medeni paýtagty — 2024” maksatnamanyň çäginde Türki dünýäsiniň ýazyjylaryň forumy we TÜRKSOÝ-nyň Ýazyjylar birleşiginiň mejlisi geçirildi.
Çärä TÜRKSOÝ-nyň Ýazyjylar birleşiginiň Prezidenti Ulugbek Esdewlet, Türkiýäniň Ýazyjylar birleşiginiň Prezidenti Musa Kazym Arykan, Ýewraziýa Ýazyjylar birleşiginiň Prezidenti Ufuk Tuzman, Gyrgyzystanyň Ýazyjylar birleşiginiň Prezidenti Kanybek Imanaliýew, Özbegistanyň Ýazyjylar birleşiginiň wekili Gaýrat Mejit, Gazagystanyň Ýazyjylar birleşiginden Kasymhan Begmanow, Ankara uniwersitetiniň Durmuş ylymlary institutynyň müdiri Ýyldyrym Beýazyt, Türkmenistandan şahyrlar we prozaçylar gatnaşdylar.
TÜRKSOÝ-nyň Baş sekretary Soltan Raýew duşuşykda eden çykyşynda: “Bu forum, türki dünýäsiniň baý edebi mirasyny açyp görkezmek we umumy medeni mirasymyzy geljekki nesillere ýetirmek üçin ajaýyp mümkinçilikdir” – diýip aýtdy.
TÜRKSOÝ-nyň Ýazyjylar birleşiginiň mejlisinde türk dünýäsiniň edebi ösüşi üçin dürli taslamalar we pikirler ara alnyp maslahatlaşyldy. Bu nukdaýnazardan ýaş ýazyjylary goldamak, edebi eserleri dürli dillere terjime etmek we olary halkara giňişligine çykarmak, şeýle hem bilelikdäki edebi çäreleri we bäşleşikleri guramak ýaly teklipler edildi.
Forumyň çäginde goşgy okamak, Türkmen döwlet medeniýet institutynyň talyplarynyň ýazyjylar bilen duşuşygy we beýleki çäreler geçirildi.
ORIENT news
