Türkmenistanyň döwlet Ýolbaşçylary Prezident Putini doglan güni mynasybetli gutladylar
Türkmenistanyň döwlet Baştutany Serdar Berdimuhamedow Russiýanyň Prezidenti Wladimir Putini doglan güni mynasybetli gutlap, rus kärdeşiniň adyna gutlag ýollady. Onda şeýle diýilýär: “Biz Türkmenistanda döwletlerimiziň arasyndaky dostlukly gatnaşyklaryň ösdürilmegine goşýan şahsy goşandyňyza ýokary baha berýäris hem-de hoşniýetli goňşuçylygyň, özara hormat goýmagyň, ynanyşmagyň köpýyllyk däplerine daýanýan strategik hyzmatdaşlygymyzyň mundan beýläk-de pugtalandyryljakdygyna ynanýarys”.
Türkmenistanyň Halk Maslahatynyň Başlygy Gurbanguly Berdimuhamedow hem Russiýa Federasiýasynyň Prezidenti Wladimir Putine tüýs ýürekden gutlaglaryny ýollap: “Türkmenistan bilen Russiýa Federasiýasynyň arasyndaky däp bolan dostlukly, uzak möhletleýin we strategik häsiýete eýe bolan gatnaşyklar ähli ugurlar boýunça yzygiderli ösdürilýär” diýip, aýratyn belledi.
Türkmen halkynyň Milli Lideri bilelikdäki tagallalaryň netijesinde türkmen-rus döwletara gatnaşyklarynyň, özara bähbitli hyzmatdaşlygyň halklaryň bähbidine mundan beýläk-de pugtalandyryljakdygyna berk ynam bildirdi.
Türkmenistanyň döwlet ýolbaşçylary Russiýa Federasiýasynyň Baştutanyna berk jan-saglyk, egsilmez gujur-gaýrat we uly üstünlikleri arzuw etdiler.
Türkmen-rus gatnaşyklary dostlugyň we hyzmatdaşlygyň berk binýadyna, medeni we ykdysady hyzmatdaşlyga esaslanýar.
Iki ýurt hem dürli ugurlar boýunça hyzmatdaşlygy alyp baryp, ol sebit durnuklylygynyň we sebitde ýaşaýan halklaryň gülläp ösmeginiň berkidilmegine mümkinçilik berýär.
Munuň bilen birlikde, Türkmenistan we Russiýa Federasiýasy täze ugurlar boýunça hyzmatdaşlygy giňeltmekde uly mümkinçilikleri görýärler.
Duşenbe güni Putin doglan gününi belleýär. Ol 72 ýaşady.
ORIENT news
