Türkmen mekdep okuwçylary Malaýziýada geçirilen Bütindünýä ýaş alymlaryň bäsleşiginde üstünlikli çykyş etdiler
Türkmenistanly mekdep okuwçylary Kuala-Lumpur şäherinde geçirilen 6-njy bütindünýä bäsleşigine we oýlap tapyşlaryň sergisine (WICE) gatnaşyp, ýurduň adyndan mynasyp çykyş etdiler diýip, Türkmenistanyň Bilim ministrligi habar berýär.
Çäräniň guramaçylary bolup Indoneziýanyň Ýaş alymlar assosiasiýasy hem-de Malaýziýanyň MAHSA Uniwersiteti (Malaysian Allied Health Sciences Academy) çykyş etdiler.
Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 11-nji synp okuwçysy Kerimberdi Myratlyýew “Novalorep web-saýty” taslamasy üçin ýörite baýraga hem-de altyn medala mynasyp boldy. Şol mekdebiň 12-nji synp okuwçysy Mergenow Ohuzhan “Gözegçilik edilýän atmosferaly gurluş” taslamasy üçin kümüş medal bilen sylaglanyldy, ýokary synp okuwçylary Ödemyradow Rahmanberdi we Arslanow Aýhan “E-awto web-saýty” we “E-kärende web-saýty” taslamalary bilen mynasyp çykyş edip, kümüş medallara eýe boldular.
Abraýly halkara bäsleşige jemi dünýäniň 15 ýurdundan – Indoneziýadan, Meksikadan, Malaýziýadan, Gazagystandan, ABŞ-den, Günorta Afrikadan, Günorta Koreýadan, Türkiýeden, Hindistandan, BAE-dan, Belarusdan, Tailanddan, Bangladeşden, Wýetnamdan we beýleki ýurtlardan 120-den gowrak mekdep okuwçylary gatnaşdylar.
ORIENT news
