Türkmenistan Kamboja, Albaniýa, Portugaliýa we Filippinler bilen gatnaşyklary berkidýär
28-nji sentýabrynda Nýu-Ýork şäherinde BMG-niň Baş Assambleýasynyň 79-njy mejlisiniň çäginde Türkmenistanyň Daşary işler ministri Raşid Meredow beýleki döwletlerden bolan birnäçe kärdeşleri bilen duşuşdy.
Şunlukda Kamboja Patyşalygynyň Premýer-ministriniň orunbasary, Daşary işler we halkara hyzmatdaşlygy ministri Sok Çenda Sofea bilen bolan duşuşygyň dowamynda iki ýurdyň daşary syýasat edaralarynyň arasynda syýasy geňeşmeleri geçirmek boýunça özara düşünişmek hakynda Ähtnama gol çekildi.
Taraplar iki ýurduň arasyndaky işewürlik we söwda hyzmatdaşlygynyň mümkinçiliklerini ara alyp maslahatlaşdylar.
Şeýle hem Günorta-Gündogar Aziýa ýurtlarynyň assosiasiýasy (ASEAN) bilen bilelikdäki çäreleri guramak we hyzmatdaşlygyň geljegine seretdiler.
Albaniýa Respublikasynyň Ýewropa ișleri we Daşary işler ministri Igli Hasani bilen geçirilen duşuşykda ilçileri akkreditasiýa etmegiň we syýasy geňeşmeleri geçirmegiň üsti bilen ýola goýulýan yzygiderli dialogyň ähmiýeti nygtaldy. Duşuşygyň barşynda söwda we senagat hyzmatdaşlygyny giňeltmek, syýahatçylyk, maýa goýumlaryny çekmek we iki ýurduň işewür toparlarynyň arasyndaky gatnaşyklary ýola goýmak bilen baglanyşykly meselelere garaldy.
Duşuşyga gatnaşyjylar dürli ugurlarda döwletara hyzmatdaşlygyny ösdürmek üçin bilelikdäki resminamalary işläp düzmek barada pikir alyşdylar.
Portugaliýanyň Döwlet ministri we Daşary işler ministri Paulu Ranžel bilen geçirilen duşuşykda suw serişdelerini dolandyrmak, sanlylaşdyrmak, ylym, medeniýet we bilim pudagynda gatnaşyklary ýola goýmaga gyzyklanma bildirdiler. Şeýle hem Türkmenistanda we Portugaliýada geçirilýän çärelere gatnaşmagyň mümkinçiliklerini ara alyp maslahatlaşdylar.
Filippinleriň Daşary işler ministri Enrike Manalo bilen bolsa ykdysady, medeni we ynsanperwer ugurlarda hyzmatdaşlygy giňeltmegiň mümkinçiliklerine garaldy.
Merkezi Aziýa we ASEAN ýurtlarynyň arasyndaky hyzmatdaşlygyň täze görnüşini döretmek hakyndaky türkmen tarapynyň başlangyjy duşuşykda ara alnyp maslahatlaşylan esasy meseleleriň birine öwrüldi. Türkmenistan söwda-ykdysady we medeni-ynsanperwer ugurlarda hyzmatdaşlygy giňeltjek “Merkezi Aziýa – ASEAN” dialog mehanizmini ösdürmegi teklip etdi.
ORIENT news
