Türkmenistan bilen BMG-niñ özara hyzmatdaşlygy: parahatçylyk döredijilige ähmiýet
Türkmenistanyñ Daşary işler ministri Raşid Meredow BMG-niñ Baş Assambleýasynyñ 79-njy sessiýasynyñ çäginde 28-nji sentýabrda BMG-niñ Baş sekretarynyñ parahatçylyk dörediji işler boýunça orunbasary Žan-Pýer Lakrua bilen duşuşdy.
Türkmenistan halkara parahatçylygyñ we howpsuzlygyñ üpjün edilmegine ygrarlylygyny tassyklady. Taraplar parahatçylyk döredijilik işiniñ çäginde hyzmatdaşlygy berkitmegiñ ähmiýetini ara alyp maslahatlaşdylar hem-de bu ugurda özara gatnaşyklary ösdürmegiñ uly mümkinçiliginiñ bardygyny bellediler diýip, DIM-niñ habarlarynda aýdylýar.
Parahatçylyk döredijilik işi boýunça döwletara dialogy üçin amatly meýdança hökmünde BMG-niñ BA-nyñ Ýörite komitetiniñ orny duşuşygyñ esasy meseleleriniñ biri boldy. Maslahata gatnaşyjylar bu edaranyñ çäginde parahatçylyk döredijilik işine hemmetaraplaýyn umumy çemelerleriñ işlenilip taýýarlanylmagynyñ wajyplygy barada aýratyn belläp geçdiler.
Türkmenistanyñ hemişelik Bitaraplyk hukugyndan ugur alyp, türkmen tarapy parahatçylygy pugtalandyrmak boýunça halkara tagallalaryna gatnaşmak meselelerine garamaga taýýardygy barada habar berdi. Türkmenistanyñ Bitaraplyk hukugyny hasaba almak bilen BMG-niñ degişli edarasynyñ işine gatnaşmak mümkinçilikleri ara alnyp maslahatlaşyldy.
Halkara howpsuzlygyñ täze çagyryşlary we wehimleri hem-de olaryñ parahatçylyk döredijilik işine ýetirýän täsiri barada pikirler alyşyldy.
ORIENT news
