Moskwada GDA-nyň Ykdysady geňeşiniň 103-nji mejlisi geçirildi
Moskwada Garaşsyz Döwletleriň Arkalaşygynyň Ykdysady geňeşiniň 103-nji mejlisi geçirildi.
Arkalaşygyň beýleki agza ýurtlarynyň wekilleri bilen bir hatarda, mejlisiniň işine Türkmenistanyň GDA-nyň Ykdysady geňeşiniň Ykdysady meseleler boýunça komissiýasynyň ýanyndaky doly ygtyýarly wekili, Türkmenistanyň Russiýa Federasiýasyndaky Adatdan daşary we Doly ygtyýarly ilçisi Esen Aýdogdyýew gatnaşdy.
103-nji mejlisi GDA-nyň Ykdysady geňeşiniň başlygy, Russiýa Federasiýasynyň Hökümetiniň Başlygynyň orunbasary Alekseý Owerçuk alyp bardy.
Ykdysady geňeşiň agzalary özara söwdadaky päsgelçilikler boýunça hemişelik ýokary derejeli Iş toparynyň alyp barýan işleriniň netijeleri bilen tanyşdylar. Hususan-da, birleşdirilen kararlary kabul etmek üçin GDA-nyň çäginde bilermenler tarapyndan toplumlaýyn öwrenilmegini we köptaraplaýyn geňeşmeleri talap edýän differensional aksiz goýumlaryny ulanmak, eksport ýygymlaryny ýygnamak we laýyklyk şahadatnamalarynyň ykrar edilmezligi bilen baglanyşykly meseleler ara alnyp maslahatlaşyldy.
Duşuşykda GDA agza ýurtlaryň arasynda raýat gämi gurluşygyny ösdürmek we gäminiň böleklerini öndürmek boýunça hyzmatdaşlyk baradaky Ylalaşygyň taslamasyna garaldy. Resminamanyň taslamasynda, GDA agza ýurtlaryň arasyndaky hyzmatdaşlygy ösdürmegiň esasy ugurlaryny, şol sanda bilelikdäki maksatnamalary we taslamalary durmuşa geçirmek, gämi gurluşygy we gämi böleklerini öndürmek boýunça hünärmenler üçin okuw meýilnamalaryny işläp düzmek boýunça ýokary okuw mekdepleriniň özara hyzmatdaşlygy utgaşdyrmagy göz öňünde tutýar.
GDA agza ýurtlaryň arasynda ýerasty suwlary öwrenmek, ulanmak, goramak we gözegçilik etmek boýunça hyzmatdaşlygy ösdürmegiň Maksatnamasynyň taslamalary we ony durmuşa geçirmegiň 2030-njy ýyla çenli döwür üçin çäreleriň meýilnamasy hödürlendi.
Ykdysady geňeşiň agzalary Garaşsyz Döwletleriň Arkalaşygyna agza döwletlerinde 2020-nji ýylyň 6-njy noýabryndaky radioaktiw materiallary serhetaşa daşamak baradaky Ylalaşygy durmuşa geçirmek üçin çäreleriň meýilnamasyny tassykladylar.
Mundan başga-da, gatnaşyjylara ulag toplumyny sanly görnüşde özgertmek babatynda Garaşsyz Döwletleriň Arkalaşygyna agza döwletleriniň arasyndaky Hyzmatdaşlyk Ähtnamasynyň taslamasy hödürlendi. Ol GDA agza ýurtlaryň ulag toplumyny sanly özgertmek ugrunda döwletara hyzmatdaşlygy giňeltmäge we çuňlaşdyrmaga, sanly ulag infrastrukturasyny gurmak üçin institusional we infrastruktura özgertmeleri üçin zerur we ýeterlik şertleri döretmäge gönükdirilendir.
Ykdysady geňeşiň indiki mejlisi 2024-nji ýylyň 29-njy noýabrynda Moskwa şäherinde geçirmek meýilleşdirilýär.
ORIENT news
