Türkmenistanyň Gruziýadaky ilçisi Gruziýanyň Bilim, ylym we ýaşlar ministri bilen duşuşdy
2024-nji ýylyň 4-nji iýunynda Türkmenistanyň Gruziýadaky Adatdan daşary we Doly ygtyýarly ilçisi D.Seýitmämmedow bilen Gruziýanyň Bilim, ylym we ýaşlar ministri G.Amilahwariniň arasynda duşuşyk geçirildi.
Duşuşykda taraplar ylym, bilim we ýaşlar syýasaty ýaly ugurlar boýunça ikitaraplaýyn hyzmatdaşlygyň häzirki ýagdaýyny we mundan beýläk hem ösdürmegiň mümkinçiliklerini ara alyp maslahatlaşdylar.
Şeýle-de bilelikdäki taslamalary, maksatnamalary taýýarlamak, Türkmenistanda we Gruziýada geçirilýän halkara olimpiadalara, konferensiýalara, seminarlara we beýleki çärelere mekdep okuwçylaryň we talyplaryň gatnaşmaklarynyň hem-de iki ýurduň ýokary okuw mekdepleriniň arasynda hyzmatdaşlyk etmek hakynda ylalaşyklara gol çekmek meselelerine garaldy.
G.Amilahwari ylmy-bilim pudagy döwletara gatnaşyklarynyň ileri tutulýan ugurlarynyň biridigini aýtdy. Şeýle hem ol, bu ugurdaky gatnaşyklar iki ýurduň halklarynyň dostlugyny berkidýändigini we özara düşünişmegiň esasy serişdeleriniň biri hökmünde çykyş edýändigini belläp geçdi.
ORIENT news
