BSGG-niň Türkmenistandaky Ýurt boýunça edarasy gämileriň sanitariýa barlagyny geçirmek boýunça okuw geçirdi
Bütindünýä saglygy goraýyş guramasynyň Türkmenistandaky Ýurt boýunça edarasy BSGG-niň Ýewropa sebit býurosy bilen bilelikde gämileriň sanitariýa barlagyny geçirmek we gämi sanitariýa şahadatnamalaryny bermek boýunça okuw sapagyny gurady.
Çärä Türkmenistanyň Saglygy goraýyş we derman senagaty ministrliginiň, «Türkmendeňizderýaýollary» agentliginiň, Döwlet weterinariýa gullugynyň, Döwlet karantin gullugynyň wekilleri, Türkmenbaşy Halkara deňiz portunyň işgärleri we bu ugurda zähmet çekýän hünärmenler gatnaşdylar.
Bu okuw sapagy Bütindünýä saglygy goraýyş guramasynyň Merkezi Aziýada saglyk hyzmatlarynyň hilini ýokarlandyrmak üçin «Bitewi saglyk» atly Hereketleriň çarçuwaly maksatnamasyny durmuşa geçirmek arkaly Türkmenistanyň milli kuwwatyny ýokarlandyrmak ugrundaky tagallalarynyň çäginde geçirildi.
Howa menzilleri, portlar we ýerüsti ulag geçelgeleri ýaly giriş nokatlary halkara syýahat we söwda sebäpli ýüze çykyp biljek jemgyýetçilik saglyk hadysalarynyň öňüni almakda, ýüze çykarmakda we olara jogap bermekde möhüm ähmiýete eýedir.
ORIENT news
