Türkmen hünärmenleri Türkiýede ýer serişdelerini dolandyrmagyň usullary bilen tanyşýarlar
BMG-niň Ösüş Maksatnamasynyň “Köpsanly bähbitleri almak üçin Aral deňziniň sebitinde ýer serişdelerini we ýokary tebigy gymmatlyga bolan ekoulgamlary gorap saklamak we durnukly dolandyrmak” taslamasynyň çäklerinde BMG-niň FAO guramasynyň “Ýer serişdelerini dolandyrmak boýunça Merkezi Aziýa ýurtlarynyň başlangyjy” taslamasy bilen bilelikde ýerleriň şorlaşmagynyň öňüni almak we çölleşmä garşy göreşmek ulgamynda tejribe öwrenmek maksady bilen Türkiýe Respublikasyna sapar guraldy.
Türkmenistanyň wekiliýetiniň düzümine Daşky gurşawy goramak we Oba hojalyk ministrlikleriniň, Lebap we Daşoguz welaýatlarynyň häkimlikleriniň hem-de Durnukly ösüş boýunça döwletara toparynyň ylmy-maglumat merkeziniň wekilleri girdi.
On alty günlük saparyň dowamynda ýurdumyzyň wekiliýeti Türkiýäniň Howanyň üýtgemegi, daşky gurşawy goramak we şähergurluşyk ministrliginiň hem-de Oba we tokaý hojalygy ministrliginiň ýerli müdirlikleriniň görkezme meýdançalaryna baryp gördüler. Adana şäherinde gatnaşyjylar topragyň hasyl berijiligini gowulandyrmak we durnukly oba hojalygy boýunça ýerli başlangyçlar bilen tanyşdyryldy. Konýa şäherinde tokaý zolaklaryny döretmek hem-de suw tygşytlaýjy tehnologiýalary ornaşdyrmak boýunça giň möçberli taslamalar bilen tanyşdyryldy, Gaziantep şäherinde bolsa wekiliýet agzalaryna şäher we oba jemgyýetçilikleriniň çölleşmäniň öňüni almak we tebigy serişdeleri gorap saklamak üçin bilelikde alyp baran işleriniň netijeleri barada gürrüň berildi, diýlip BMG-niň Ösüş maksatnamasynyň internet sahypasynda habar berilýär.
ORIENT news
