Türkmenistan we Latwiýa Ykdysady hyzmatdaşlyk boýunça Hökümetara toparynyň mejlisini geçirer
Türkmenistanyň daşary işler ministriniň orunbasary Ahmet Gurbanow bilen Latwiýanyň Türkmenistandaky Adatdan daşary we Doly ygtyýarly ilçisi (oturýan ýeri Daşkent ş.) Reýnis Trokşa Ykdysady, senagat we ylmy-tehniki hyzmatdaşlyk boýunça hökümetara toparynyň nobatdaky mejlisini geçirmegiň meselelerini ara alyp maslahatlaşdylar.
Sişenbe güni, 21-nji maýda Türkmenistanyň Daşary işler ministrliginde geçirilen ikitaraplaýyn gepleşiklerde özara işewürlik saparlaryny hem-de Medeniýet günlerini guramagyň, şeýle hem bilim ulgamynda hyzmatdaşlygy işjeňleşdirmegiň mümkinçilikleri ara alnyp maslahatlaşyldy.
2023-nji ýylyň iýun aýynda Rigada Türkmenistan we Latwiýa Ulaglar boýunça bilelikdäki iş toparynyň nobatdaky, üçünji mejlisini geçirdiler, onda iki ýurduň arasynda logistika üpjünçilik zynjyryny ösdürmegiň meýilnamalary ara alnyp maslahatlaşyldy. Şol bir wagtyň özünde, Merkezi Aziýanyň bäş döwleti we Latwiýa ulag we logistika pudagyndaky hyzmatdaşlyk barada Bilelikdäki beýannama gol çekdiler.
ORIENT news
