Türkmenistan we Gyrgyzystan derman senagatynda hyzmatdaşlyk etmegi meýilleşdirýärler
Türkmenistanyň saglygy goraýyş we derman senagaty ministri Myrat Mämmedow Gyrgyzystanyň saglygy goraýyş ministri Alymkadyr Beýşanaliýew bilen duşuşdy.
Taraplar derman senagaty hem-de lukmançylyk tehnikasy ulgamynda hyzmatdaşlygyň meselelerini ara alyp maslahatlaşdylar. Antibiotikleri öndürmek boýunça Türkmen-hindi bilelikdäki kärhanasynda öndürilýän ýokary hilli we arzan bahaly derman serişdelerini Gyrgyzystanyň bazaryna ornaşdyrmak mümkinçiligi duşuşygyň esasy meseleleriniň biri boldy.
Şeýle hem duşuşygyň gün tertibine Hazar deňziniň kenaryndan alynýan bejergi palçygynyň önümçiligini Gyrgyzystanda ýola goýmak meselesi girizildi. Myrat Mämmedow bejergi palçygyny lukmançylykda ulanmak boýunça tejribe paýlaşdy hem-de bu ugurda hyzmatdaşlygy ýola goýmagy teklip etdi diýip, AKI press habar berýär.
Mundan başga-da, türkmen önüm öndürijileriniň öndürýän derman serişdelerini we medisina tehnikalaryny Gyrgyzystana ibermek mümkinçiligi maslahatlaşyldy. Türkmen tarapy önümçilik we medisina preparatlaryny hem-de tehnikalary öndürýän kärhanalary barada maglumat berdi, şeýle hem gyrgyz kärdeşleri bilen hyzmatdaşlygy giňeltmäge taýýardygyny beýan etdi.
A.Beýşanaliýew Türkmenistan bilen hyzmatdaşlygy çuňlaşdyrmaga gyzyklanmalaryny beýan edip, iki ýurduň saglygy goraýyş ulgamyny gowulandyrmak üçin tejribe alyşmak işiniň möhümdigini belledi.
ORIENT news
