Türkmenistanyň Döwlet gullugy akademiýasynyň diňleýjisi Hytaýyň döwlet dolandyrylyşy bilen tanyşýar
Türkmenistanyň Prezidentiniň ýanyndaky Döwlet gullugy akademiýasynyň 1-nji ýyl talyby Pürli Rasulow Aziýanyň, Afrikanyň we Ýuwaş ummany sebitiniň 56 ýurdunyň wekilleri bilen birlikde Pekin uniwersitetinde geçirilýän döwlet dolandyrylyşy boýunça gysga möhletli okuw maslahatyna gatnaşýar.
Olar maslahatyň çäklerinde ýokary okuw mekdepleriniň öňdebaryjy professorlarynyň okuw sapaklaryna gatnaşýarlar hem-de Hytaýda döwlet dolandyrylyşynyň dürli ugurlary bilen tanyşýarlar. Maslahata gatnaşyjylar Hytaýyň Lukmançylyk ylymlary akademiýasyna, Senagat we maglumat tehnologiýalary ministrligine hem-de Garyplygy azaltmak boýunça halkara merkezine baryp gördüler, bu edaralaryň düzümi we alyp barýan işleri bilen tanyşdylar we nazaryýet bilimlerini berkitdiler.
Türkmenistanyň wekili Pekin uniwersitetiniň wise-prezidentine Merkezi Aziýada ilkinji “akylly” şäher bolan Arkadag şäherine bagyşlanan “Arkadag-geljegiň şäheri” atly kitaby sowgat berdi.
Bu gysga möhletli okuw maslahaty Pekin uniwersitetiniň Bilim gaznasy tarapyndan maliýeleşdirilýän we 2019-njy ýylda ýola goýlan “Gündogaryň stipendiýasy” atly taslamanyň çäklerinde geçirilýär we Hytaýyň ykdysady we durmuş ösüşi, döwlet dolandyrylyşynyň usullary bilen tanyşdyrmaga gönükdirilendir.
Okuw maslahaty iýun aýynyň başyna çenli dowam eder.
Pürli Rasulow
