Aşgabat we Daşkent hyzmatdaşlygyň täze gün tertibini döredýärler
Duşenbe güni, 15-nji martda wise-premýer, Türkmenistanyň daşary işler ministri Raşid Meredow bilen Özbegistanyň Prezidenti Şawkat Mirziýoýewiň arasynda geçirilen duşuşykda öňde boljak ýokary derejeli duşuşyklara taýýarlyk görmegiň çäklerinde Aşgabat bilen Daşkentiň arasyndaky köptaraplaýyn hyzmatdaşlygyň täze gün tertibini döretmegiň meselelerine aýratyn üns çekildi.
Merkezi Aziýanyň we Aýlagdaky arap döwletleriniň hyzmatdaşlyk geňeşine agza ýurtlaryň daşary işler ministrleriniň mejlisine gatnaşmak üçin Daşkentde bolýan ministr Özbegistanyň Baştutanyna Türkmenistanyň Prezidenti Serdar Berdimuhamedowyň hem-de türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň salamyny we hoşniýetli arzuwlaryny ýetirdi.
Duşuşygyň dowamynda ikitaraplaýyn dostlukly we hoşniýetli gatnaşyklary ösdürmegiň, strategiki hyzmatdaşlygy pugtalandyrmagyň wajyp meseleleri ara alnyp maslahatlaşyldy. Özara söwda dolanyşygynyň ösýändigi, hususan-da, «Şawat – Daşoguz» serhetýaka söwda zolagynyň döredilmeginiň muňa uly itergi berjekdigi bellenildi. Senagat kooperasiýasy, energetika, ulag we logistika pudaklarynda, obasenagat toplumynda özara bähbitli hyzmatdaşlyk dowam etdirilýär.
Medeni-ynsanperwer ugrundaky hyzmatdaşlyk has-da giňeýär. Şu ýyl Özbegistanda türkmen şahyry Magtymguly Pyragynyň 300 ýyllygyny bellemek bilen baglanyşykly birnäçe çäreler geçiriler.
Şeýle hem sebit we halkara gün tertibiniň möhüm meseleleri boýunça pikir alyşmalar boldy diýlip, Özbegistanyň Prezidentiniň saýtynda habar berilýär.
ORIENT news
