Türkmenistan we Hytaý Ygtyýarly ykdysady operatorlar maksatnamasyny kämilleşdirmegiň meselesini ara alyp maslahatlaşdylar
Ygtyýarly ykdysady operatorlar (YYO) maksatnamasyny kämilleşdirmek baradaky pikir alyşmalar Hytaý Halk Respublikasynyň Baş gümrük müdirliginiň wekilleriniň Türkmenistana amala aşyran saparynyň esasy maksady boldy.
Saparyň dowamynda Hytaýyň wekiliýeti Türkmenistanyň Döwlet gümrük gullugynyň ýolbaşçylary bilen duşuşdy. Taraplar 2023-nji ýylyň 19-njy oktýabrynda Pekinde gol çekilen Türkmenistanyň Döwlet gümrük gullugy bilen Hytaý Halk Respublikasynyň Baş gümrük müdirliginiň arasynda Ygtyýarly ykdysady operatorlaryň maksatnamasynyň mümkinçiliklerini ýokarlandyrmak boýunça özara düşünişmek hakynda Ähtnamanyň durmuşa geçirilişini ara alyp maslahatlaşdylar. Olar Türkmenistanyň YYO institutyny netijeli ornaşdyrmak ugrundaky tagallalaryna ýokary baha berdiler.
Hytaýyň gümrük edarasynyň wekilleri türkmenistanly kärdeşleri üçin okuw sapagyny geçirdiler. Olar Ygtyýarly ykdysady operatorlar maksatnamasyny durmuşa geçirmek boýunça tejribelerini paýlaşdylar.
Şeýle hem daşary ýurtly myhmanlar Türkmenistanyň Döwlet gümrük gullugynyň düzümi bilen hem tanyşdyryldy we Arkadag şäheriniň gümrükhanasyna gezelenç guraldy.
ORIENT news
