Dubaýyň elektroenergetika we suw üpjünçiligi müdirligi «Apple Vision Pro» enjamy üçin mobil programma hödürledi
Dubaýyň elektroenergetika we suw üpjünçiligi müdirligi (Dubai Electricity and Water Authority, DEWA) «Apple Vision Pro» wirtual hakykat enjamy üçin özüniň akylly mobil programmasyny hödürledi.
Bu ädim «Apple Vision Pro-nyň» ösen mümkinçiliklerinden peýdalanmak arkaly müşderilere hödürlenýän hyzmatlary gowulandyrmaga gönükdirilendir.
Ulanyjy özüniň şahsy hasabyny ulanyp, «Apple Pay» arkaly jemagat hojalygy hyzmatlarynyň töleglerini töläp, «Smart Living» dolandyryş paneline girip biler. Mundan başga-da, müşderi «My Sustainable Living» programmasynyň üsti bilen elektrik togunyň we suwuň sarp edilişi barada jikme-jik hasabat alyp biler.
Bu hasabatlarda sarp edişiň netijeliligini ýokarlandyrmak üçin şahsy maslahatlar hem berilýär.
Elektroenergetika we suw üpjünçiligi müdirligi tarapyndan döredilen bu innowasion çemeleşme diňe bir müşderilere hödürlenýän hyzmatlaryň hilini ýokarlandyrman, eýsem, Dubaýyň «akylly şäher» bolmak maksatlaryna hem laýyk gelýär.
ORIENT news
