Aşgabatda geçirilen TDG-niň Aksakgallar geňeşiniň 15-nji mejlisiniň jemleri boýunça Beýanat kabul edildi
Aşgabatda geçirilen Türki Döwletleriň Guramasynyň Aksakgallar geňeşiniň 15-nji mejlisiniň jemleri boýunça Beýanat kabul edildi. Taraplar aç-açanlyk, dostlukly, netijeli ýagdaýda özara gyzyklanma bildirilýän has möhüm meseleler boýunça pikir alyşdylar. Ýaşulular söwda, ykdysadyýet, medeniýet, bilim, ýaşlar syýasaty we beýleki ugurlarda hyzmatdaşlygy pugtalandyrmagyň möhümliginiň artýandygyny beýan etdiler.
Ýaşulular adamzadyň ösüşine ägirt uly täsirini ýetiren «Türki guşakda» esasy orny eýelän Beýik Ýüpek ýoluny dikeltmek strategiýasynyň aýratyn ähmiýetiniň bardygyny bellediler. Taraplar türki halklaryň arasynda dostlukly gatnaşyklary we özara düşünişmegi pugtalandyrmagyň, ýaşlara ruhy mirasyň asylly däplerine laýyklykda watançylyk terbiýesini bermegiň Aksakgallar geňeşiniň işiniň ileri tutulýan esasy ugurlarynyň biridigini bellediler.
Ýaşulular 2024-nji ýylda türki döwletlerde beýik akyldar şahyr we ylym-bilimi ýaýradyjy Magtymguly Pyragynyň doglan gününiň 300 ýyllyk ýubileýiniň baýram edilmegini gutladylar.
Aksakgallar geňeşiniň mejlisiniň dowamynda beýan eden maslahatlarymyzyň we kabul eden çözgütlerimiziň doganlyk halklarymyzy has-da ýakynlaşdyrmakda, Türki Döwletleriň Guramasynyň ösüş ugruny kesgitlemekde hökman ulanyljakdygyna berk ynanýaryn diýip, türkmen halkynyň Milli Lideri Gurbanguly Berdimuhamedow belledi.
ORIENT news
