Aşgabatda «SOYUNO.VA» brendiniň täze lybaslar toplumynyň görkezilişi geçirildi
«SOYUNO.VA» brendi agşamlyk köýnekleriniň täze toplumyny tanyşdyrdy. Aşgabatdaky «Gül Zaman» modalar öýüniň dabaralar zalynda ýaýbaňlandyrylan çäre Halkara zenanlar gününiň öňüsyrasynda geçirildi.
Dizaýner Aýşat Söýünowa lybaslar toplumyny döredende meşhur «Ýuwaş gelin» filminden, has takygy, filmiň baş gahrymanynyň keşbinden ylham alypdyr.
Her bir modeliň çykyşy Selbi atly gelniň keşbini – onuň saçynyň bejeriliş stilini, makiýažyny we lybaslaryny gaýtadan dikeltdi. Lybaslar toplumynyň awtorlary keşplere biraz Ýewropa ülňülerini goşup, ony milli türkmen bezeg esbaplary bilen utgaşdyrdylar.
Mundan başga-da, modelleriň podiumdaky çykyşy geçmişe alyp baran sazlar bilen utgaşdy. Orkestriň ýerine ýetirmeginde Nury Halmämmedowyň ölmez-ýitmez sazlary ýaňlandy.
«SOYUNO.VA» brendiniň her bir lybaslar toplumy aýratyn bir hekaýany gürrüň berýär. Bu gezek tomaşaçylara söýýän ýigdine durmuşa çykmak üçin oba ýerine gelen şäherli gyzyň hekaýasy garaşýardy.
ORIENT news
