Türkmenistanda 7 kilometr çuňlukdaky känlerden nebit gazyp almaga mümkinçilik berjek täze enjamlar ornaşdyrylar
Türkmenistanyň Prezidenti Serdar Berdimuhamedow nebitgazly känlerde çuňlugy 7 müň metrden geçýän guýularda degişli işleri geçirmäge mümkinçilik berjek täze enjamlar we serişdeler bilen üpjün etmek boýunça alnyp barylýan işleri dowam etdirmegi tabşyrdy.
Bu baradaky degişli görkezmeler penşenbe güni geçirilen Ministrler Kabinetiniň mejlisinde wise-premýer Batyr Amanowa berildi.
Hasabatda bellenişi ýaly, guýularyň önümçiligini ýokarlandyrmak we täze çuň guýulary burawlamak üçin nebitgaz ýataklarynda döwrebap ugurdaş enjamlar, tehniki serişdeler bilen üpjün etmek babatda ähli şertler döredilýär. Prezident Serdar Berdimuhamedow nebitiň çykarylýan möçberini artdyrmak üçin «Türkmennebit» döwlet konserniniň maddy-enjamlaýyn binýadyny yzygiderli kämilleşdirip durmagyň wajypdygyny belledi.
ORIENT news
