Türkmenistanyň ýolbaşçylary Şahbaz Şarifi Pakistanyň Premýer-ministri wezipesine saýlanmagy bilen gutlady
Türkmenistanyň Prezidenti Serdar Berdimuhamedow Şahbaz Şarifi Pakistan Yslam Respublikasynyň Premýer-ministri wezipesine saýlanmagy bilen gutlady.
Türkmenistanyň Prezidentiniň gutlag hatynda: "Biz dostlukly türkmen-pakistan gatnaşyklaryna ýokary baha bermek bilen, onuň mundan beýläk-de ösdürilmegi üçin degişli işleri dowam etdireris" diýilýär.
Serdar Berdimuhamedow Şahbaz Şarife jan saglyk, bagtyýarlyk we abadançylyk, Pakistanyň doganlyk halkyna bolsa parahatçylyk, ösüş we rowaçylyk arzuw etdi.
Türkmen halkynyň Milli Lideri, Halk Maslahatynyň Başlygy Gurbanguly Berdimuhamedow hem Pakistanyň Premýer-ministrini gutlady. Ol Türkmenistan bilen Pakistanyň arasyndaky dostlukly we birek-birege hormat goýmak esasyndaky gatnaşyklaryň halklarymyzyň bähbidine ösjekdigine we güýçlenjekdigine ynam bildirdi we Şahbaz Şarifiň bu döwlet wezipesinde uly üstünlikleri arzuw etdi.
ORIENT news
