Owgan wekiliýeti Türkmenbaşy halkara deňiz portuna baryp gördi
3-nji martda Owganystanyň senagat we söwda ministriniň wezipesini ýerine ýetiriji Alhaj Nuruddin Aziziniň ýolbaşçylygyndaky wekiliýet Türkmenbaşy Halkara deňiz portuna baryp gördi. Bu barada “Türkmendeňizderýaýollary” agentligi habar berýär.
Saparyň dowamynda wekiliýet agzalary Türkmenbaşy Halkara deňiz portunyň we onuň terminallarynyň mümkinçilikleri bilen tanyşdylar. Hususan-da, olary üstaşyr ýükler üçin ýörüte gümrük tertibi bilen tanyşdyrdylar. Bu tertibe laýyklykda, üçünji taraplara harytlaryň üstaşyr eksporty üç ýyla çenli möhlet bilen gümrük pajy alynmazdan amala aşyrylýar.
Owgan wekiliýetiniň ýolbaşçysy terminalyň sowadyjy konteýnerler ammaryny üns bilen synlady hem-de owgan gök önümleriniň we gury iýmişleriniň saklanyş şertleri bilen gyzyklandy.
Şeýle hem saparyň dowamynda myhmanlar “Balkan” gämi gurluşyk zawodynyň mümkinçilikleri, gämilerde geçirilýän abatlaýyş işleri bilen tanyşdyryldy.
Owganystanyň senagat we söwda ministriniň wezipesini ýerine ýetirijisi Türkmenistanyň deňiz ulag infrastrukturasyny döwrebaplaşdyrmak boýunça alyp barýan işine ýokary baha berdi.
ORIENT news
